काठमाडौं (हाम्रो खेलकुद) – राष्ट्रिय बास्केटबल टोलीका कप्तान सधिश प्रधानले भारतमा व्यसायिक बास्केटबल खेल्ने भएका छन् । भारतको राजस्थान बास्केबल लिग (आरबिएल) खेल्नका लागि सधिश शुक्रबार त्यसतर्फ जाँदैछन् ।

आरबिएलको आयोजकको निमन्त्रणमा त्यसतर्फ जानका लागेका सधिशले आफूले खेल्ने टोलीको टुंगो भने केहि दिनमा लाग्ने बताएका छन् । केहि दिन खेलाडीहरुको छनोट हुने बताइएको छ । ‘मलाई चाहिँ ड्राफ्टमा राखिसकेको जानकारी पाएको छु,’ सधिशले हाम्रो खेलकुदसँग भने, ‘सायद अक्सन हुन्छ र त्यसपछि कुन क्लबबाट खेल्ने टुंगो लाग्नेछ ।’

गत वर्ष स्वदेशमा भएको १३ औं दक्षिण एसियाली खेलकुद (साग) मा सधिशकै कप्तानीमा नेपालले कास्य पदक जितेको थियो । सधिश पहिलो पटक भारतमा व्यवासयिक खेलका लागि जाँन लागेको हुन् । उनले यसअघि बंगलादेश बास्केबल लिग खेलेका थिए । सधिशसँग विनोद महर्जन र विक्रम जोशीले सन् २०१० देखि २०१५ सम्म बंगलादेशमा खेलेका थिए ।

दक्षिण एसियाली राष्ट्रमा भारत बास्केटबलको पावर हाउस भएका कारण त्यहाँको राज्यस्तरको लिग खेल्न पाउनुलाई पनि सधिशले ठूलो अवसरका रुपमा लिएका छन् । ‘भारतीय राष्ट्रिय टोलीका खेलाडीले पनि आरबिएल खेल्ने जानकारी पाएको छ,’ उनले थपे, ‘त्यसअर्थ यो मेरो लागि एउटा अवसर हो । अनुभव बटुल्न, आफ्नो स्तर एउटा मौका त हुन्छ नै त्योसँगै मैले राम्रो गर्न सके भने भविष्यमा हाम्रा अन्य खेलाडीलाई पनि ढोका खुल्न सक्छ ।’

सधिशका अनुसार दोस्रो संस्करणको आरबिएल ६ टोलीको सहभागिता रहने सिंगल लिग चैतको ९ गते सम्म चल्नेछ । आयोजकले पत्र प्राप्त भएपछि नेपाल बास्केबल संघको स्वीकृति लिएर आफू भारत जान लागेको पनि सधिशले जानकारी दिए ।

१२ वर्षदेखि राष्ट्रिय टोलीको महत्त्वपूर्ण सदस्य रहँदै आएका सधिश राष्ट्रिय खेलकुदको पाँचौं, छैटौं र आठौं संस्करणमा उपविजेता टोलीको सदस्य थिए । सधिश सम्मिलित आर्मी सातौं राष्ट्रिय खेलकुदको भने च्याम्पियन बनेको थियो ।

राष्ट्रिय तथा अन्तर्राष्ट्रिय खेलाडी संघले दुई वर्षअघि आयोजना गर्ने अवार्डमा उत्कृष्ट बास्केबल खेलाडीको अवार्ड जितिसकेका सधिशले १० औं सागका सर्वाधिक स्कोरर हुन् । दुई वर्ष आयोजित नेपाल बास्केटबल लिग (एनबिएल) को विजेता टोलीका कप्तान समेत रहेका सधिश त्यसमा मस्ट भ्यालुयबल प्लेयर र हाइस्ट स्कोरर बनेका थिए ।

नेपालले साफ बास्केटबल च्याम्प्यियनसिपमा चार पटक कास्य पदक जित्दा पछिल्लो तीन पटक सधिशले नै टोलीको नेतृत्व गरेका थिए । एनबिएल, सागको प्रदर्शनका आधारमा आफूलाई बोलाइएको सधिशको विश्वास छ ।