धरान (हाम्रो खेलकुद) – इटहरी स्ट्याग्सले होराइजन ‘ए’ लाई पराजित गर्दै नेपाल बास्केटबल लिग इस्ट थ्रि बाई थ्रि अन्तर्गत धरानको उपाधि जितेको छ । धरानको इन्डोर बास्केटबल कोर्टमा भएको एक दिने प्रतियोगिताको फाइनलमा इटहरीले होराइजन ‘ए लाई १३–१० को झिनो अन्तरले पराजित गर्दै उपाधि जितेको हो ।

इटहरी स्ट्याग्स र होराइजन ‘ए’ ले भदौ १० माहुने बिर्तामोडको इस्ट फाइनल्समा पनि स्थान पक्का गरेको छ । यसअघि सेमिफाइनलमा इटहरीले आफ्नै ‘बी’ टिमलाई १५–८ ले पराजित गरेको थियो । होराइजन ए ले पनि आफ्नो ‘सी’ टिमलाई १२–९ ले हराएको थियो ।

धरानको प्रतियोगितामा कुल १६ टिम रहेको थियो । १६ टोलीलाई चार समूहमा विभाजन गरिदा हरेक समूहका शीर्ष दुई टोलीले क्वाटरफाइनला स्थान बनाएका थिए । शुक्रबार भएको बिराटनगरको प्रतियोगितामा इस्टर्न स्विस र बाल कल्याण बिद्यामन्दिरले शीर्ष दुई स्थान ओगटेका थिए ।

आइतबार बिर्तामोडको प्रतियोगिता हुनेछ । त्यहाँको शीर्ष दुई टोलीले १० गतेको फाइनल खेल्नेछन् । एनबिएल इष्ट आयोजक बिपन्न बालबालिका खेलकुद नेपाल (पिडिसिएन) ले पश्चिममा पनि एनबिएल वेष्टको नाममा अर्को प्रतियोगिता आयोजना गर्नेछ । पश्चिमका प्रमुख शहरहरु पोखरा, बुटवल र धनगढीमा एनबिएल वेष्ट हुनेछ र इस्टकै र्फम्याटमा खेलाइनेछ ।

पिडिसिएनमा पुरुषहरुको दुई संस्करणको नेपाल बास्केटबल लिग र महिलाहरुको वुमेन्स नेपाल बास्केटबल लिग सञ्चालन गरिसकेको छ । दुवै प्रतियोगिता नेपाली बास्केटबल इतिहासकै सर्वाधिक लामो र सर्वाधिक धनराशीको प्रतियोगिता रहेको छ ।