प्रकाश तिमल्सिना, काठमाडौं

नेपाल ओलम्पिक कमिटी (एनओसी) का महासचिव लामा टेण्डी शेर्पा उपचारका लागि अमेरिकाबाट भारतको नयाँ दिल्ली आउने भएका छन् । अमेरिकाको समय अनुसार मंगलबार साँझ ७ बजे कुवेत एयरमार्फत टेण्डी आफ्ना ठूलो दाई नवाङ निमा शेर्पाका साथ भारततर्फ आउनेछन् ।

इएलेस डिजिज नामक नसा सम्बन्धि रोगबाट पीडित टेण्डी केहि महिना अघि उपचारका लागि अमेरिका गएका थिए । तर, उनलाई लागेको रोगको अहिले सम्म उपचार पत्ता लागि नसकेको बताइएको छ । टेण्डी अहिले बोल्न सक्दैनन् ।

केहि दिन अघि मात्र टेण्डीले आफ्नो पछिल्लो अवस्थाका बारेमा हाम्रो खेलकुदसँग साटेका थिए । झन्डै दुई दशकदेखि नेपाली खेलकुदमा सक्रिय टेण्डीको गत वर्ष रोग पत्ता लागेको थियो । दिल्लीमा उनको आयुवेर्दिक उचार गरिने टेण्डीका दाजुले बताए ।

‘हामीले गत वर्ष केरेलाको आयुर्वेदशालामा जाने प्रयासमा थियौं । त्यहाँ सिट पाउन सकिएन । त्यसकै दिल्लीमा रहेको शाखामा अहिले सिट पाइएको छ,’ पछिल्लो ५ वर्षदेखि अमेरिकामा बस्दै आएका उनले भने, ‘टेण्डीको इच्छा अनुसार हामी त्यहाँ जान लागेका छौं । नेपालमा उसका केहि साथी आउन सक्छन् ।’

राष्ट्रिय खेलकुद परिषद्(राखेप) का पूर्व उपाध्यक्ष टेण्डी नेपाल बास्केबटल संघका अध्यक्ष हुन् । दुई दशक अघि सितोरियो कराते संघको सदस्य हुँदै खेलकुदमा औपचारिक रुपमा प्रवेश गरेका उनी त्यसपछि टेबल टेनिस संघ हुँदै बास्केबल संघमा पुगेका थिए । पछिल्लो १२ वर्षदेखि उनी बास्केटबल संघको अध्यक्ष छन् ।

तत्कालिन नेकपा एमालको भातृ संगठन नेपाल खेलकुद महासंघका महासचिव टेण्डी अनेरास्ववियूका पूर्व विद्यार्थी नेता हुन् । उनी दुई पटक अमृत साइन्स क्याम्पसको सभापति निर्वाचित भएका थिए ।