काठमाडौं (हाम्रो खेलकुद) – विभागीय टोली त्रिभुवन आर्मी क्लब क्विक्स नेपाल बास्केटबल लिगको फाइनलमा प्रवेश गरेको छ ।

मंगलबार दशरथ रंगशालास्थित कभर्ड हलमा टाइम्स इन्टरनेशनल कलेजलाई पहिलो क्वालिफायर अन्तर्गत तेस्रो खेलमा ६९-६१ ले पराजित गर्दै आर्मी लगातार दोस्रो सिजन फाइनल प्रवेश गरेको हो । अघिल्लो सिजन आर्मी फाइनलमा गोल्डेन गेटसँग पराजित भएको थियो ।

पहिलो क्वालिफायरमा पराजित टाइम्सले अब दोस्रो क्वालिफायरमा अर्को विभागीय टोली नेपाल पुलिस क्लबको सामना गर्नेछ । यसअघि पुलिसले साविक विजेता गोल्डेन गेटलाई एलिमिनेटरमा पराजित गर्दै अगाडी बढेको थियो ।

मंगलबारको निर्णायक खेलमा चौथौ क्वाटरको सुरुवातसम्म स्कोर ५१–५१ को बराबरीमा रहेपनि आर्मीले त्यसपछि लगातार अंक जोड्दै जित पक्का गर्यो । पहिलो क्वाटरमा आर्मीले १८–१२ को अग्रता लिएको थियो । दोस्रो क्वाटर टाइम्सले १८–१३ को अग्रता लिएपछि खेल ३१–३० को रोमाञ्चक मोडमा पुगेको थियो ।

तेस्रो क्वाटर १५–१५ को बराबरीमा सकिँदा खेलमा आर्मीले एक अंककै अग्रता कायम गरिरहन सफल भएको थियो । तर, चौथो क्वाटरमा आर्मीले २३–१६ को अग्रता लिदै जित पक्का गर्यो । आर्मीको जितमा आयुष सिंहले उत्कृष्ट प्रदर्शन गर्दै २६ अंक, ५ रिवाउन्ड, २ स्टिल र एक असिस्ट गरे ।

प्रतियोगिताअन्तर्गत पुरुष र महिलाको फाइनल ७ असारमा हुनेछ । महिलातर्फ भाटभेटेनी समृद्धि गोरिल्लाज र नेपाल पुलिस क्लब फाइनलमा प्रवेश गरेका छन् । प्रतियोगितामा पहिलो र दोस्रो हुने दुवैतर्फ टोलीले क्रमशः दुई र एक लाख रुपैयाँ प्राप्त गर्नेछन् ।