काठमाडौं (हाम्रो खेलकुद) – साविक विजेता गोल्डेन गेट इन्टरनेशनल कलेज क्विक्स नेपाल बास्केटबल लिग (एनबीएल) को उपाधि होडबाट बाहिरिएको छ ।

सोमबार भएको एलिमिनेटर चरणको दोस्रो खेलमा नेपाल पुलिस क्लबले गोल्डेन गेटलाई ९०-६५ ले पराजित गरेपछि साविक विजेताको यात्रा सकिएको हो । गोल्डेन गेटले यसअघि आइतबार भएको पहिलो खेलमा पनि हार बेहोरेको थियो । यस जितसँगै पुलिस भने दोस्रो क्वालिफायरको लागि छनोट भएको छ । पहिलो क्वालिफायर अन्तर्गत त्रिभुवन आर्मी क्लब र टाइम्स इन्टरनेशनल क्लबबीचको खेलमा पराजित हुने टोलीले ‘बेस्ट अफ थ्री’ मा हुने दोस्रो क्वालिफायरमा पुलिसको सामना गर्नेछ ।

सोमबार भएको दोस्रो एलिमिनेटरमा गोल्डेन गेटले पहिलो क्वाटरमा अग्रता बनाएपनि दोस्रो र तेस्रो क्वाटरमा लय गुमाउँदा हार बेहोर्नुपर्यो । प्रभावशाली खेलाडी राजीव जोशी दोस्रो क्वाटरको सुरुवातमा घाइते हुनुले पनि गोल्डेन गेटको प्रदर्शनमा असर परेको थियो । पहिलो क्वाटरमा २१-१३ को अग्रता लिएको गोल्डेन गेटले दोस्रो क्वाटरमा भने ९ अंक मात्र थप्न सक्यो । खेलको मध्यान्तरमा पुलिसले ३७-३० को अग्रता बनायो ।

तेस्रो क्वाटरमा पनि पुलिसले आफ्नो उत्कृष्ट लय कायम राख्दै अग्रता झनै फराकिलो बनायो । पुलिसले तेस्रो क्वाटरमा ३३ अंक जोड्दा गोल्डेन गेटले त्यसको जवाफमा ८ अंकमात्र फर्काउन सक्यो । चौथो क्वाटरमा गोल्डेन गेटले २७ अंक जोडेपनि खेलको नतिजा बदल्न त्यो पर्याप्त रहेन । पुलिसले २० अंक जोड्दै अग्रता कायम राख्यो र दोस्रो क्वालिफायरमा आफ्नो स्थान पक्का गर्यो । खेलमा उत्कृष्ट प्रदर्शन गरेका पुलिसका विकास गुरुङ म्यान अफ द म्याच भए ।

यसैगरी क्वालिफायरको दोस्रो खेलमा टाइम्सले एकतर्फी खेलमा आर्मीलाई पराजित गर्दै प्लेअफ १-१ को बराबरीमा ल्यायो । पहिलो क्वाटरदेखि नै अग्रता लिएको टाइम्सले आर्मीलाई ८१-५७ ले हराउँदै निर्णायक खेलमा नतिजा तय गर्ने समिकरण निकाल्यो । मंगलबार हुने खेलको विजेताले फाइनलमा प्रवेश गर्नेछ भने पराजित हुने टोली पुलिससँग दोस्रो क्वालिफायरमा खेल्नेछ ।