काठमाडौं (हाम्रो खेलकुद) – विभागीय त्रिभुवन आर्मी क्लब र नेपाल पुलिस क्लबले नेपाली बास्केटबल इतिहासकै सबैभन्दा लामो र ठूलो प्रतियोगिता क्विक्स नेपाल बास्केटबल लिग (एनबीएल) को प्ले अफको पहिलो खेलमा सफलता हात पारेका छन् ।

त्रिपुरेश्वरस्थित राष्ट्रिय खेलकुद परिषदको कभर्डहलमा आइबार भएको खेलमा आर्मीले टाइम्स इन्टरनेशनल क्लबलाई तथा पुलिसले गोल्डेनगेट कलेजलाई पराजित गर्दै प्ले अफको पहिलो खेलमा सफलता हात पारेको हो । आर्मीले टाइम्सलाई ७९–६५ ले पराजित गर्यो ।

आर्मीले पहिलो क्वाटरमा २६–१३ को अग्रता लिएको लिएको थियो । दोस्रो क्वाटरमा पनि आर्मीले २२–२० को अग्रता लिदै जिततर्फ अग्रसर भएको थियो । तर, तेस्रो क्वाटरमा आर्मी ९–१७ ले पछि परेपछि खेल ५७–५० को निकै रोमाञ्चक मोडमा पुगेको थियो । अन्तिम क्वाटरमा आर्मी २२–१५ ले विजयी हुन सफल भयो । आर्मीको जितमा आयुस सिंहले २४ अंकको योगदा दिए ।

आइतबारै भएको अर्काे खेलमा पुलिसले गोल्डेनगेट क्लबलाई ७८–७२ ले पराजित गर्दै विजयी भएको हो । पुलिस पहिलो र दोस्रो क्वाटरमा २०–२२ र २१–२२ ले पछि परेको थियो । तर, त्यसपछि पुलिसले उत्कृष्ट प्रदर्शन गर्दै तेस्रो क्वाटरमा १३–१२ र चौथो क्वाटरमा २४–१६ को अग्रता लिदै जित निकाल्न सफल भयो । पुलिसको जितमा बिकास गुरुङले २३ अंकको योगदान दिए ।

सोमबार पहिलो खेलमा पुलिस र गोल्डेनगेट तथा दोस्रो खेलमा आमी र टाइम्सबीच नै खेल हुनेछ ।
प्ले अफका खेलहरु बेस्ट अफ थ्री का आधारमा हुनेछ । लिगको शीर्ष दुई टोलीले ३ खेल खेल्नेछन् । प्लेअफमा आर्मी र टाइम्सले बेस्ट अफ थ्रीका आधारमा पहिलो क्वालिफायर खेल्नेछन् जसबाट विजयी टोली सिधै फाइनल प्रवेश गर्नेछ ।

लिगमा तेस्रो स्थान प्राप्त गरेको गोल्डेनगेट र चौथो स्थानको पुलिसले बेस्ट अफ थ्रि एलिमिनेटर खेल्नेछन् । विजयी टोलीले पहिलो क्वालिफायरको पराजित टोलीसँग फाइनल प्रवेशका लागि दोस्रो क्वालिफायर खेल्नेछ । दोस्रो क्वालिफायर पनि बेस्ट अफ थ्री कै आधारमा खेलाइनेछ । फाइनल ७ असारमा हुनेछ ।