काठमाडौं (हाम्रो खेलकुद)- समृद्धि गोरिल्लाजले राजधानीमा जारी वुमेन्स नेपाल बास्केटबल लिगमा लगातार तेस्रो जित निकालेको छ । टाइम्स इन्टरनेनल कलेज चारखालमा सोमबार भएको खेलमा समृद्धि गोरिल्लाजले साइपाल एकेडेमीलाई ४०–२२ ले पराजित गर्दै लिगमा लगातार तेस्रो जित हात पारेको हो ।

समृद्धले यसअघि नेपाल पुलिस क्लब र आइएसओ काइटलाई पराजित गरेको थियो । पहिलो क्वाटरमा समृद्धिले ९–७ को झिनो अग्रता लिदा दोस्रो क्वाटरमा ४–९ ले पछि परेको थियो । त्यसपछि समृद्धिले तेस्रो क्वाटरमा १०–२ को तथा चौथो क्वाटरमा १७–४ को अग्रता लिदै सहज जित निकाल्यो । समृद्धिको जितमा एलिना गुरुङले १२ अंकको योगदान गरिन् ।

सोमबार भएको अर्काे खेलमा विभागीय नेपाल पुलिस क्लबले आइसओ काइटलाई ७६–६३ ले पराजित गर्दै लिगमा दोस्रो जित निकाल्न सफ ल भयो । पुलिस पहिलो खेलमा समृद्धिसँग नै पराजित भएयता पराजित भएको छैन ।

पुलिसले शुरुवाती तीन क्वाटरमा २०–११, २०–१४ र १९–१६ को अग्रता लिदै जिततर्फ अग्रसर बनेको थियो । चौथो क्वाटरमा पुलिस १७–२२ ले पछि परेपनि अघिल्ला क्वाटरमा लिएको अग्रता जितमा पर्याप्त बन्यो । पुलिसको जितमा अन्सु महर्जनले २१ अंकको योगदान दिइन् ।

लिगमा मंगलबार बिहान समृद्धि गोरिललाज र पुलिस तथा साँझ साइपाल एकेडेमी र आइएसओ काइटबीच प्रतिस्पर्धा हुनेछ । पुरुषतर्फ आर्मी र एएनके कीर्तिपुरबास्केटबल टिमबीच खेल हुनेछ ।