काठमाडौं (हाम्रो खेलकुद)-साविकको उपविजेता विभागीय त्रिभुवन आर्मी क्लबले राजधानीमा होम एन्ड लिगको आधारमा जारी क्वीक्स नेपाल बास्केटबल लिगमा जित हात पारेको छ । आर्मीले दि रोयल बास्केटबल टिमलाई ९७–८५ को स्कोरमा पराजित गरेको हो ।

यो जितसँगै आर्मीले एक खेल बाँकी रहँदा शीर्ष स्थानमा उक्लने सम्भावना बढाएको छ । लिगको अन्तिम खेलमा आर्मीले एएनके कीर्तिपुर बास्केटबल टिमलाई पराजित गरे लिगको शीर्षस्थानमा उक्लदै प्ले अफ पुग्नेछ ।

आर्मीले पहिलो क्वाटर २५–३० ले पछि परेको थियो । दोस्रो र तेस्रो सेटमा आर्मीले २२–१७ र २८–१६ को अग्रता लिदै खेललाई आफ्नो पक्षमा पारेका थिए । चौथो क्वाटर २२–२२ को बराबरीमा सकिएपछि आर्मीले दोस्रो र तेस्रो क्वाटरमा लिएको अग्रता नै जितमा पर्याप्त बन्यो । आर्मीका जितमा ३३ अंकको योगदा दिएका रोविन खत्री खेलको म्यान अफ दि म्याच घोषित भए । उनले ३ हजार रुपैया पाए ।

लिगमा बुधबार दि रोयल बास्केटबलटिम र बिएमसी साउथसाइडर्सबीच खेल हुनेछ । यता, महिलातर्फ शनिबारबाट शुरु भएको वुमेन्स नेपाल बास्केटबल लिगमा समृद्धि गोरिल्लाजले जियी शुरुवात गरेका छन् ।

टाइम्स इन्टरनेसनल कलेजको खेल मैदानमा शनिबार भएको पहिलो खेलमा समृद्धिले विभागी नेपाल पुलिस क्लबमाथि ४९–४६ को प्रतिस्पर्धात्मक जित निकालेको हो । पहिलो क्वाटरमा ५–६ ले तथा दोस्रो क्वाटरमा १२–१८ ले पछि परेको समृद्धिले त्यसपछिको दुवै क्वाटरमा १४–११ र १८–११ को अग्रता लिदै रोमाञ्चक र प्रतिस्पर्धात्मक जित निकाल्न सफल भयो ।

समृद्धिको जितमा नेपालको महिला टोलीका कप्तान समेत रहेका सदिना श्रेष्ठले १८ अंकको योगदान दिइन् । उनी नै खेलको वुमन अफ दि म्याच घोषित भइन् । महिला लिगमा आइतबार आइएसओ काइट र साइपाल एकेडेमीबीच खेल हुनेछ ।