काठमाडौं (हाम्रो खेलकुद) – गोल्डेनगेट इन्टरनेसनल कलेजले राजधानीमा होम एन्ड अवे लिगको आधारमा जारी क्वीक्स नेपाल बास्केटबल लिगमा बिएमसी साउथ साइडर्समाथि सहज जित निकालेको छ ।

गोल्डेनगेटले घरेलु मैदानमा साउथ साइडर्समाथि १०४–६५ को सहज जित निकालेको हो । जितसँगै गोल्डेनगेटले प्ले अफ पुग्ने सम्भावना जीवितै राखेको छ । गोल्डेनगेटको १२ खेलबाट १८ अंक जोडेर पाँचौ स्थानमा रहेको छ । समान १२ खेलबाटै २० अंक जोडेको विभागीय नेपाल पुलिस क्लब चौथो स्थानमा रहेको छ ।

गोल्डेनगेटले दुवै खेल एएनके कीर्तिपुर बास्केटबल टिमसँग खेल्नेछ । पुलिसले टाइम्स र दि रोयल बास्केटबलसँग खेल्न बाँकी छ । एक खेल बाँकी रहँदा तेस्रो स्थानमा रहेको बुढानिलकण्ठको २० अंक रहेको छ । टाइम्सले लगभग प्ले अफलाई स्थान सुरक्षित गर्दा बाँकी तीन स्थानका लागि आर्मी, बुढानिलकण्ठ, पुलिस र गोल्डेनगेटबीच प्रतिस्पर्धा रहेको छ ।

घरेलु मैदानमा गोल्डेनगेटले साउथ साइडर्सलाई कुनै पनि क्वाटरमा खुलेर खेल्न दिएन । सबै क्वाटरमा अग्रता बनाएको गोल्डेनगेटले पहिलो क्वाटरमा २७–८ को फराकिलो अग्रता लिएको थियो । दोस्रो क्वाटरमा २७–२१ ले अघि बढेको गोल्डेनगेटले तेस्रो र चौथो क्वाटरमा २६–१५ र २४–२१ को अग्रता लिदै सहज जित निकाल्न सफल भयो ।

गोल्डेनगेटको सहज जितमा विनोद श्रेष्ठले सर्वाधिक २१ अंकको योगदान दिए । उनी नै खेलको म्यान अफ दि म्या घोषित हुदै ३ हजार रुपैया पाए । प्रतियोगितामा मंगलबार पुलिस र टाइम्स तथा साउथ साइडर्स र आर्मीबीच खेल हुनेछ ।