काठमाडौं(हाम्रो खेलकुद)- विभागीय नेपाल पुलिस क्लब र बुढानिलकण्ठ नगरपालिका बास्केटबल टिमले राजधानीमा जारी क्वीक्स नेपाल बास्केटबल लिगमा सहज जित निकालेको छ ।

बिहीबार भएको खेलमा पुलिसले साविकको विजेता गोल्डेनगेट कलेजलाई ९६–८२ को अन्तरले पराजित गरेको हो । पहिलो राउन्डमा पनि पुलिसले ७९–७० ले पराजित गरेको थियो ।

गोल्डेनगेटले कुनै पन क्वाटरमा अग्रता लिन सकेन । पुलिसले पहिलो क्वाटरमा २१–१३ को आरामदायी अग्रता बनाएको थियो । त्यसपछि निकै प्रतिस्पर्धात्मक बनेको दोस्रो क्वाटरमा पुलिसले ३०–२८ को अग्रता लियो ।

तेस्रो क्वाटरमा पनि पुलिस २३–२१ ले अघि रहँदा चौथो क्वाटरमा पुलिसले २२–२० को अग्रता लिदै जित हात पा¥यो । पुलिसको जितमा २७ स्कोर गरेका बिमल कार्की खेलको म्यान अफ दि म्याच घोषित भए । उनले ३ हजार रुपैया हात पारे ।

जितसँगै पुलिस ९ खेलबाट १४ अंक जोडेर पाँचौ स्थानमा रहेको छ । पराजित गोल्डेनगेट ११ खेलबाट १६ अंक जोडेर तेस्रो स्थानमा रहेको छ । बिहीबारको अर्काे खेलमा बुढानिलकण्ठले बिएमसी साउथ साइडर्सलाई ८५–५९ ले हरायो ।

बुढानिलकण्ठले पहिलो क्वाटमा ३१–२० को अग्रता लियो । दोस्रोमा २५–१४ को अग्रता लिएपनि तेस्रो क्वाटरमा १२–१५ ले पछि परेपनि चौथो क्वाटरमा १७–१० को अग्रता लिदै जित निकाल्न सफल भयो । बुढानिलकण्ठको जितमा विराज रानाले १४ अंकको योगदान दिए । उनी नै खेलको म्यान अफ दि म्याच घोषित हुदै ३ हजार रुपैया जिते ।

बुढानिलकण्ठ ११ खेलबाट १६ अंक जोडेर चौथो स्थानमा रहँदा साउथ साइडर्स ११ अंक जोडेर छैटौ स्थानमा रहेको छ । प्रतियोगितामा शुक्रबार एएनके कीर्तिपुर बास्केटबल टिम र नेपल पुलिस क्लबबीत खेल हुनेछ ।