काठमाडौं (हाम्रो खेलकुद) – विभागीय टोली त्रिभुवन आर्मी क्लबले राजधानीमा जारी ‘होम एण्ड अवे’ क्वीक्स बास्केटबल लिगमा आफ्नो अपराजित यात्रालाई कायमै राखेका छन् ।

तस्बिर : आर्को एसिया

लिग अन्र्तगत शनिबार भएको खेलमा आर्मीले हिमालयन हन्डस्लाई ८३–५८ को अन्तरमा पराजित गर्दै आफ्नो अपराजित यात्रालाई यथावत राखेका हुन् । लिगमा अपराजित रहने आर्मी एक्लो टोली हो । आठ खेल खेलेको आर्मीले ८ खेलबाट २४ अंक जोडेर लिगको शीर्ष स्थानमा यथावत रहेका छन् । घरेलु मैदानमा आर्मीले पहिलो क्वार्टरमा २०–१० को अग्रता बनाएको थियो । दोस्रो क्वार्टरमा २५–१५ तथा तेस्रो क्वार्टरमा २६–१९ को अग्रता बनाएको आर्मी चौथो क्वार्टरमा भने १२–१४ ले पछि परेको थियो । आर्मीको जितमा कप्तान सदिश प्रधानले ३३ अंकको योगदान दिए ।

शनिबारै भएको दोस्रो खेलमा दोस्रो स्थानमा रहेको गोल्डेन गेट कलेजले जेभियर कलेजमाथि ७५–५९ को सहज जित निकाल्यो । गोल्डेनगेटले पहिलो क्वार्टरमा १९–११ को अग्रता बनाएको थियो । दोस्रो क्वार्टरमा पनि २२–१७ को अग्रता बनाएको गोल्डेनगेटले तेस्रो क्वार्टरमा भने २३–१४ को अग्रता बनाएपनि चौथो क्वार्टर ११–१७ ले गुमायो । गोल्डेनगेटका मनिष राजोपाध्यायले सर्वाधिक २१ अंकको योगदान दिए । जितसँगै गोल्डेनगेटले १० खेलबाट १८ अंक जोड्दै दोस्रो स्थानमा यथावत रहेको छ ।

लिग अन्र्तगत आइतबार कीर्तिपुर बास्केटबल टिम र साउथ साइडर्सबीच खेल हुनेछ ।