काठमाडौं (हाम्रो खेलकुद) – अघिल्लो दुवै संस्करणको विजेता विभागीय टोली त्रिभुवन आर्मी क्लब र पश्चिमाञ्चल विकास क्षेत्रले तेस्रो संस्करणको प्रधान सेनापति राष्ट्रिय पुरुष भलिबल प्रतियोगितामा विजयी शुरुवात गरेका छन् ।

लगनखेलस्थित सैनिक शारीरिक तथा खेलकुद केन्द्रको कवर्डहलमा आइतबार भएको पहिलो खेलमा आर्मीले मध्यपश्चिममाथि ३–० को सोझो सेटमा पराजित गर्यो । आर्मीले मध्यपश्चिमलाई २५–८, २५–१२ र २५–१४ को सहज जित निकाल्यो ।

यस्तै आइतबारै भएको अर्काे खेलमा पश्चिमाञ्चल विकास क्षेत्रले पूर्वाञ्चलमाथि ३–० कै सहज जित निकाल्यो । पहिलो सेट २५–१७ ले आफ्नो पक्षमा पारेको पश्चिमाञ्चलले दोस्रो सेट २५–२१ ले जित्दा तेस्रो सेट २५–१४ ले आफ्नो पक्षमा पार्दै प्रतियोगितामा जित निकाल्न सफल भयो ।
समूह ‘ए’ मा त्रिभुवन आर्मी क्लब, मध्य पश्चिमाञ्चल विकास क्षेत्र, सुदूर पश्चिमाञ्चल विकास क्षेत्र र विभागीय सशस्त्र प्रहरीको एपीएफ क्लब रहेका छन् ।

यस्तै समूह ‘बी’मा नेपाल पुलिस क्लब, मध्यमाञ्चल विकास क्षेत्र, पूर्वाञ्चल विकास क्षेत्र र पश्चिमाञ्चल विकास क्षेत्र रहेका छन् ।
प्रतियोगिता अन्र्तगत सोमबार दुई खेल हुनेछ । पहिलो खेल नेपाल पुलिस क्लब र मध्यमाञ्चलबीच खेल हुनेछ । दोस्रो खेलमा सुदूरपश्चिमाञ्चल र नेपाल एपीएफ क्लबबीच खेल हुनेछ ।

लिग कम नकआउटको आधारमा हुने प्रतियोगिताको विजेताले ३ लाख रुपैया प्राप्त गर्नेछ । दोस्रो हुनेले १ लाख ५० हजार र तेस्रो हुनेले ७५ हजार प्राप्त गर्नेछ । यस्तै प्रतियोगिताको उत्कृष्ट स्पाइकर, ब्लकर, डिफेन्डर, लिफ्टर र प्रशिक्षकले समान १० हजार प्राप्त गर्नेछ ।

प्रतियोगितामा ३ विभागसहित तत्कालीन ५ प्रदेशसहित ८ टिमको सहभागिता रहने आयोजक सेनाले जनाएको छ । प्रतियोगिता फागुन ६ गतेबाट १२ गतेसम्म लगनखेलस्थित सैनिक शारीरिक तथा खेलकुद केन्द्रको कवर्डहलमा हुनेछ । सहभागी टोलीलाई दुई समूहमा विभाजन गरिएको छ । हरेक समूहका शीर्ष दुई टोली क्वार्टरफाइनल प्रवेश गर्नेछन् ।