काठमाडौं (हाम्रो खेलकुद) – दोस्रो संस्करणको रोजवड उपत्यकाव्यापी बास्केटबल प्रतियोगिता बिहिबारदेखि सुरु हुने भएको छ । काठमाडौं उपत्यकाका विभिन्न स्कुलले सहभागिता जनाउने प्रतियोगिता मंसिर ७ गतेदेखि १७ गतेसम्म आयोजना हुनेछ ।

आयोजक रोजबड स्कुलले काठमाडौंमा पत्रकार सम्मेलन गर्दै दोस्रो संस्करणको पुरुष तथा महिला बास्केटबल प्रतियोगिता आयोजना गर्ने जानकारी गराउँदै प्रतियोगिताको सम्पूर्ण तयारी पूरा भएको पनि जानकारी गराएको छ ।

प्रतियोगितामा विभिन्न स्कुलका कक्षा ११ र १२ मा पढ्ने विद्यार्थीले मात्रै भाग लिन पाउने प्रतियोगिता संयोजक बेनी बहादुर कार्कीले जानकारी गराए । प्रतियोगितामा ब्वाइजतर्फ १६ र गर्ल्सतर्फ ६ टिमको सहभागिता रहेको छ ।

ब्वाइजतर्फ आयोजक रोजबड स्कुलसँगै ट्रिनिटी कलेज, सिसिआरसी कलेज, जेभियर्स इन्टरनेशनल कलेज, ज्ञान निकेतन कलेज, न्यु समिट कलेज, बर्नहार्ट कलेज र सैपाल एकेडेमीले भाग लिएका छन् । त्यस्तै, न्यु जेनिथ कलेज, एस स्कुल, टाइम्स कलेज, नोवेल एकेडेमी, गोल्डेन गेट कलेज, मोर्गन कलेज, नेपाल मेगा कलेज र क्याम्पियन एकेडेमीले भाग लिएका छन् ।

गर्ल्सतर्फ बृहस्पति विद्यासदन, सिसिआरसी कलेज, सैपाल एकेडेमी, एस स्कुल बर्नहार्ट कलेज र नेपाल मेगा कलेज रहेका छन् । प्रतियोगिता लिगकम नकआउटको आधारमा सञ्चालन हुनेछ । प्रतियोगिता सञ्चालन गर्न करिव २ लाख ५० हजार खर्च लाग्ने आयोजकले अनुमान गरेको छ ।