काठमाडौं (हाम्रो खेलकुद)– राजधानीमा जारी तेस्रो साबा तथा पाँचौ एसियन यू–१६ पुरुष छनोट बास्केटबल च्याम्पियनसिपको तेस्रो खेलमा आयोजक नेपालले आज उपाधिको दाबेदार भारतको सामना गर्दैछ । खेल त्रिपुरेश्वस्थित राष्ट्रिय खेलकुद परिषद (राखेप) को कभर्डहलमा दिउँस १ः३० बजे सुरु हुनेछ ।

पहिलो खेलमा भुटानको चुनौती सहजै पन्छाएको नेपालले बिहिबार अर्को बलियो टोली बंगलादेशलाई कडा टक्कर दिएपनि चौथो तथा निर्णायक सेटमा पछि पर्दा दोस्रो खेल ११ अंकले गुमाएको थियो । तेस्रो सेट सकिदासम्म नेपालले पाँच अंकले अग्रता लिइरहेको थियो । तर, त्यो अग्रतालाई नेपालले निर्णायक सेटमा जोगाउन सकेन ।

यस्तैमा आज नेपालले उपाधिको बलियो दाबेदार भारतको सामना गर्दैछ । भारतले भने खेलेका दुवै खेलमा जित हासिल गरिसकेको छ । भारतले पहिलो खेलमा माल्दिभ्सलाई १५२–१७ को फराकिलो अन्तरले पराजित गरेको थियो । भने दोस्रो खेलमा बंगलादेशलाई ८३–६४ ले हराएको थियो ।

यस्तोमा नेपाल भारतलाई रोक्ने रणनीतिका साथ मैदान ओर्लनेछ । तेस्रो दिनको खेल सकिदा भारत शतप्रतिशत जितसहित शीर्ष स्थानमा छ भने तीन खेल खेलको बंगलादेश दुई खेलमा जित र एक खेलमा हार बेहोर्दै तालिकाको दोस्रो स्थानमा छ । नेपालले २ खेलमा १–१ जित÷हार तथा भुटानले ३ खेलमा १ जित र २ हार व्यहोरेका छन् । तीन खेल खेलिसकेको माल्दिभ्स सबैमा पराजित छ ।

दक्षिण एसियाली क्षेत्रको यो प्रतियोगितामा नेपालसहित भारत, बंगलादेश, भुटान र माल्दिभ्स गरी ५ राष्ट्र सहभागी छन् । सिंगल राउन्ड रोविनका आधारमा हुने प्रतियोगितामा पहिलो हुने टोली मलेसियामा हुने पाँचौं एसियाली यु–१६ पुरुष बास्केटबलका लागि छनोट हुनेछ ।