काठमाडौं (हाम्रोखेलकुद)- पाँचौ एसियन पुरुष यू–१६ छनोट बास्केटबल च्याम्पियनसिपको दोस्रो खलमा नेपाल पराजित भएको छ । च्याम्पियनसिप अन्र्तगत बिहिबार त्रिपुरेश्वरस्थित राष्ट्रिय खेलकुद परिषद (राखेप) को कवर्डहलमा भएको छनोट चरणको दोस्रो खेलमा नेपाल शारीरिक रुपमा बलियो बंगलादेशमाथि ५७–६८ ले पराजित भएको हो ।

नेपालले पहिलो क्वार्टरमा २२–१० को नतिजा संगै १२ अंकको अग्रता निकालेपनि दोस्रो क्वार्टरको अन्त्य सम्म बंगलादेशले पुनरागमन गर्दै ३१–३२ बनाउदै अन्तर १ अंकमा झार्न सफल भएको थियो। तेस्रो क्वार्टरमा १४–१० अंक हुदाँ नेपाल पुन: ५ अंकको अन्तर बनाउन सफल भयो तर अन्तिम क्वार्टरमा बंगलादेशले उत्कृष्ट प्रदर्शन गर्दै २७ अंक स्कोर गर्दा नेपालले ११ अंक मात्र बटुल्न सक्यो । तसर्थ नेपाल ५७-६८ले पराजित भयो।

 बंगलादेशको जितमा तनवीर प्रधानले सर्वाधिक १८ स्कोर गरे । नेपालका अभिषेक सिंहले २३ अंक दिलाएपनि टिमलाई जिताउन सकेन । यसैबीच नेपाल बास्केटबल संघका अध्यक्ष लामा टेण्डी शेर्पाले बंगलादेशविरुद्ध उत्कृष्ट प्रदर्शन गरेको भन्दै टिमलाई ४५ हजार रुपैया पुरस्कृत गर्ने घोषणा गरेका छन् ।

बिहिबारै भएको पहिलो खेलमा भुटानले माल्दिभ्सलाई ६३–५४ ले पराजित गर्दै च्याम्पियनसिपमा पहिलो जित निकाल्यो । भुटानको बास्केटबलमा यो पहिलो अन्तर्राष्ट्रिय जित समेत बन्यो । भुटान यसअघि दुई खेलमा पराजित भैसकेको थियो । भुटान र माल्दिभ्सले पहिला क्वार्टरमा २०–९, दोस्रो क्वार्टरमा १८–१७ , तेस्रो क्वार्टरमा १३–९   र चौथो क्वार्टरमा १२–१९ अंक बटुले  । भुटानका छिरिङ देउजरले १७ अंक बटुले । माल्दिभ्सका थोहा मोहम्मद जायनले १३ अंक बटुले ।

च्याम्पियनसिप अन्तर्गत’ शुक्रबार नेपालले उपाधिको दावेदार भारतको सामना गर्नेछ । यस्तै माल्दिभ्सले बंगलादेशसँग खेल्नेछ । राउन्ड रोविन लिगको आधारमा जारी च्याम्पियनसिपमा दक्षिण एसियाका पाँच राष्ट्रको सहभागिता छ ।