साबा यू १६ बास्केटबल – भारत र बंगलादेशको जित

काठमाडौं (हाम्रो खेलकुद)– भारत र बंगलादेशले तेस्रो साबा तथा पाँचौं फिबा एसिया यू १६ छनोट च्याम्पियनसिपमा विजयी सुरुआत गरेका छन् । त्रिपुरेश्वरस्थित राष्ट्रिय खेलकुद परिषद् (राखेप) को कर्भड हलमा सुरु भएको च्याम्पियनसिपको पहिलो दिन मंगलबार बंगलादेशले भुटानलाई ११७–४३ ले हराएको थियो । अर्को खेलमा भारतले माल्दिभ्सलाई १५२–१७ ले पराजित गरेको थियो ।

बंगलादेशको जितमा टटलकुमार विश्वासले ३१ स्कोर गरे । बंगलादेश खेलको सुरुआतबाटै हावी भएको थियो । अनुभव हिन भुटानविरुद्ध बंगलादेशले पहिलोदेखि चौथो क्वार्टर सम्म क्रमशः ४१–११,२४–७,३३–११ र १८–१४ को अग्रता लिदै सहजै खेल आफ्नो पक्षमा पारेको थियो ।

नेपाल बास्केटबल संघले सञ्चालन गरेको च्याम्पियनसिपको आज भएको दास्रो खेलमा दाबेदार भारतले माल्दिभ्सलाई फराकिलो अन्तरले हरायो । च्याम्प्यिनसिपकै सबैभन्दा अग्ला खेलाडी ६ फिट १० इनचका प्रिन्सिपल सिंह प्रेरित भारत सामू माल्दिभ्स निरिह देखिएको थियो । ६ फिट ६ इन्चका अन्य केही खेलाडीका साथ उत्रेको भारतले पहिलो देखि चौथो क्वार्टरमा क्रमश : २६–७,४१–२,४९–२,३६–६ ले अग्रता लिएको थियो ।

च्याम्पियनसिपको औपचारिक उद्घाटन भने बुधबार मात्र हुने संघले जनाएको छ । बुधबार आयोजक नेपालले भुटानसँग र अर्को खेलमा भारतले बंगलादेशसँग प्रतिस्पर्धा गर्नेछ ।