काठमाडौं (हाम्रो खेलकुद)– राष्ट्रिय खेलकुद परिषद् (राखेप) का उपाध्यक्ष लामा टेन्डी शेर्पालाई खेलकुद सम्बन्धी कुनै पनि काम नलाउनु भन्ने युवा तथा खेलकुद मन्त्री राजेन्द्रकुमार केसी (राजन) को निर्देशनमा आज सर्वोच्च अदालतले कारण देखाउ आदेश जारी गरेको छ ।

राष्ट्रिय खेलकुद परिषद् (राखेप) का उपाध्यक्ष लामा टेन्डी शेर्पा।

उपाध्यक्ष शेर्पाले युवा तथा खेलकुद मन्त्रालयसहित ३ जनाविरुद्ध दर्ता गरेको रिट निवेदनमा चोलेन्द्र शम्शेर जबराको एकल इजिलासले कारण देखाउ आदेश जारी गरेको सर्वोच्चको वेभसाइटमा उल्लेख छ ।  शेर्पाविरुद्ध झन्डै तीन बर्ष अघि देखिनै फौजदारी मुद्दा चलिरहेका कारण भन्सार कार्यालयबाट प्राप्त पत्रका आधारमा भन्दै राखेपका अध्यक्ष समेत रहेका मन्त्री केसीले भदौं ६ गते ले काम नलगाउन राखेपलाई निर्देशन दिएका थिए ।

एमालेको भातृ संगठन नेपाल खेलकुद महासंघका महासचिव समेत रहेका शेर्पा अन्तर्राष्ट्रिय मान्यता प्राप्त नेपाल ओलम्पिक कमिटी (एनओसी) का महासचिव र नेपाल बास्केबट संघका अध्यक्ष हुन् । उनी एमालेको सिफारिसमा तीन बर्षअघि राखेप उपाध्यक्षमा मनोनित भएका थिए ।

भन्सार छलेर झण्डै २५ तोला सुन ल्याउँदै गर्दा शेर्पा २०७१ चैत १४ गते त्रिभुवन अन्तराष्ट्रिय विमानस्थलबाटै पक्राउ परेका थिए । हङकङबाट स्वदेश फर्कदा उनी राति पक्राउ परेका हुन् । शंका लागेर चेकजाँच गर्दा लामाको साथबाट सुन बरामत भएको बताइएको थियो । पछि उनी १३ लाख रुपैयाँ धरौटीमा छुटेका थिए ।