काठमाडौं (हाम्रो खेलकुद)– आयोजक ग्रिनल्याण्ड र गोल्डेनपिक स्कुल १२ औं क्वीक्स ग्रिनल्याण्ड कप अन्तर विद्यालय बास्केटबल प्रतियोगिताको क्वार्टर फाइनलमा पुगेको छ । दीलिप पुन मगरको ३१ स्कोरको मद्दतमा आइतबार सिनियर ब्वाईजको खेलमा ग्रिनल्याण्डले सामाखुसी बोडिङ स्कुल(सेब)लाई ५७–४१ स्कोरले आयो ।

सिनियर ब्वाईजको अर्को खेलमा गोल्डेनपिकले ज्ञान सिन्धुलाई ४८–३६ ले हरायो । गोल्डेनपिकका गोपाल भण्डारीले सर्वाधिक २० स्कोर गरे । दुवै टिमले समूह ‘घ’ बाट समान २ खेल जितेर एक खेल अगावै अन्तिम आठमा पुगेका हुन् । समूह विजेताका लागिा यी दुई टोलीबीच मंगलबार प्रतिस्पर्धा हुनेछ ।

सिनियर ब्वाईजमै समूह ‘क’ बाट एचएचसीए र समूह ‘ख’ बाट लक्ष्मीपुरले दुई खेलमा सफलता हासिल गर्दै एक खेलअघि नै क्वार्टरफाइनल पुगिसकेका छन् । एचएचसीएले अभियान पब्लिकलाई ४५–३५ ले र लक्ष्मीपुर स्कुलले शंखमूलको इनोभेटिभ स्कुललाई ३१–२४ ले हरायो ।

धापासीस्थित आयोजक ग्रीनल्याण्ड स्कुलको कोर्टमा भएको जुनियर ब्वाईजको खेलबाट सफलता हात पादै सेब , ग्रीनल्याण्ड , एनइए , लालीगुरास , मञ्जुगोक्ष , माउण्टग्लोरी , इडनब्रिज , मनास्लु र ओडिसी नकआउट चरण पुगिसकेका छन् ।

जुनियर ब्वाईजको खेलमा बिएनएले पोलिफिकलाई १६–१४ ले, मञ्जुगोक्षले एचएचसीएलाई ३०–१४ ले तथा ओडिसीले कान्तिपुरलाई १०–६ ले हरायो ।