थ्री वाईं थ्री बास्केटबल हुने

काठमाडौं (हाम्रो खेलकुद)- ललितपुर जिल्ला ब्याडमिन्टन संघको आयोजनामा थ्री वाई थ्री राष्ट्रिय स्तरको पुरुष तथा महिला बास्केटबल च्याम्पियनसिप हुने भएको छ । आयोजकले बिहिबार पत्रकार सम्मेलन गर्दै शनिबार र आइतबार दुई दिन राखेप कवर्डहलमा प्रतियोगिता गराउने जानकारी गराएको हो ।

प्रतियोगितामा पुरुष र महिला दुवैतर्फ गरी ७५ भन्दा बढी टिमको सहभागिता रहने छ । लिगकम नकआउटका आधारमा हुने प्रतियोगितामा धरान, झापा, विराटनगर, काभ्रे र रुपन्देहीबाट समान २–२ टोलीले पनि सहभागिता जनाउने आयोजकले जनाएको छ । १२ राष्ट्रिय खेलाडीले १२ टिमको प्रतिनिधित्व गर्नेछन् ।

प्रतियोगिताको पुरुषतर्फको विजेता टिमले ४० हजार नगदसहित ट्रफी र मेडल हात पार्नेछ । त्यस्तै, उपविजेताले २० हजार नगद प्राप्त गर्नेछ । त्यस्तै, महिलातर्फका विजेता टिमले ३० हजार र उपविजेताले १५ हजार नगदसहित ट्रफी र मेडल हात पार्नेछन् । यस्तै मोष्ट भ्यालुएवल हुने दुवै विधाका खेलाडीले समान ७–७ हजार प्राप्त गर्नेछन् ।

प्रतियोगिता सञ्चालन गर्न करिव ५ लाख खर्च हुने अनुमान गरिएके छ । थ्री बाई थ्री बास्केटबलमा नेपाल अहिले १३३ औं स्थानमा रहेको छ । यसअघि नेपाल १४६ औं स्थानमा थियो ।