काठमाडौं (हाम्रो खेलकुद)– दोस्रो संस्करणको इंगेज इम्पावर ह्वील चेयर बास्केटबल लिग यहि साता सुरु हुने भएको छ । आयोजक इंगेज इम्पावरिङले मंगलबार पत्रकार सम्मेलन गर्दै छ हप्ता चल्ने दोस्रो संस्करणको लिग गर्ने जानकारी गराएको हो ।

शनिबारबाट सुरु हुने ह्वील चेयर बास्केटबल लिगमा पुरुषतर्फ ६ र महिलातर्फ ४ टिमको सहभागिता रहेको छ । लिग हरेक शनिबार उपत्यकाका विभिन्न कलेजका कोर्टमा हुने इंगेजका कार्यक्रम संयोजक भरत बिसीले जानकारी गराए ।

प्रतियोगिताको उद्घाटन र समापन नेपाली सेनाको शारीरिक व्यायम केन्द्र लगनखेलमा हुनेछ । प्रतियोगितामा पुरुषतर्फ स्पाइनल इन्जुरी रिह्याविटेसन सेन्टर, ह्वीलचेयर स्पोर्टस एसोसिएसन, बोधिसत्व इन एक्सन, नेपाल स्पाइनल कर्ड इन्जरी स्पोर्टस एसोसिएसन, जावलाखेल ह्वीलचेयर स्पोर्टस सेन्टर र नेपाली आर्मी टिमको सहभागिता रहने बताइएको छ ।

यस्तै महिलातर्फ ह्वीलचेयर स्पोर्टस एसोसिएसन, बोधिसत्व इन एक्सन, नेपाल स्पाइनल कर्ड इन्जरी स्पोर्टस एसोसिएसन र जावलाखेल ह्वीलचेयर स्पोर्टस सेन्टरको सहभागिता छ । चार क्वार्टरमा हुने खेल आठ मिनेटको हुनेछ भने एक दिनमा करिव ५ खेल हुने इंगेजका निर्देशक कल्पना गुरुङले जानकारी गराईन् । प्रतियोगितालाई टर्किस एयरलयान्सले मुख्य प्रायोजन गरेको छ ।

पुरुषतर्फको विजेताले २० हजार, दोस्रोले १६ हजार र तेस्रो हुने टोलीले १२ हजार रुपैयाँ प्राप्त गर्नेछन् । यस्तै महिलातर्फको विजेताले १६ हजार, दोस्रोले १२ हजार र तेस्रो हुने टिमले ८ हजार प्राप्त गर्नेछन् । यस्तै मोष्ट भ्यालुएवल खेलाडील ५ हजार तथा उत्कृष्ट स्कोररले ३ हजार ५ सय रुपैयाँ प्राप्त गर्नेछन् ।