काठमाडौं (हाम्रो खेलकुद) – राष्ट्रिय बास्केटबल लिग (एनबिएल) का शीर्ष दुई टोलीबीचको प्रतिस्पर्धामा टाइम्स इन्टरनेसन कलेज विजयी भएको छ ।

त्रिपुरेश्वरस्थित राष्ट्रिय खेलकुद परिषद्को कभर्ड हलमा शनिबार भएको खेलमा टाइम्सले रोयल स्पोर्टस सेन्ट्रललाई ११७ –६७ ले हरायो । पहिलो क्वार्टरमा २८ –२३ को झिनो अग्रता लिएको टाइम्सले दोस्रोमा अग्रता थप्दै ५९–३२ र तेस्रोको अन्त्यमा ९०–५५ स्कोर गरेको थियो ।

शुक्रबारको खेल अघि दुबै टोलीको समान ६ अंक थियो । जितपछि टाइम्स शीर्षस्थानमा उक्लेको छ । २८ स्कोर गरेका टाइम्सका सदीश प्रधान खेलको म्यान अफ दी म्याच घोषित भए ।

अर्को खेलमा गोल्डेनगेट इन्टरनेसनल कलेजले कीर्तिपुर बास्केबटल क्लबलाई ओभरटाइममा ९७–९३ ले पराजित गर्यो । चौथो तथा अन्तिम क्वार्टरको समाप्तीमा ८४–८४ को बराबरीपछि खेल ओभर टाइममा गएको थियो ।

पहिलो क्वार्टरफाइनलमा गोल्डेन गेटले २३–२२ को अग्रता बबनाएको थियो । गोल्डेन गेटले दोस्रो क्वार्टरमा ५१–३३ र तेस्रोको क्वार्टरको न्त्यमा ६९–५५ को अग्रता कायम गरेको थियो ।

अन्तिम क्वार्टरमा गोल्डेन गेटले १५ स्कोर थप्दा कीर्तिपुरले उच्च प्रदर्शनका साथ २९ स्कोर गर्दै खेललाई बराबरीमा पुर्याएको थियो । २८ स्कोरका साथ कीर्तिपुरका जीवन सुनार म्यान अफ दी म्याच घोषित भए ।

नेपाल बास्केटबल संघ र डिजिफ्लाइको सहकार्यमा हुने सिंगल राउन्ड रोबिनको एनबिएलमा ८ टोली सहभागी छन् । असोज २७ गतेसम्म चल्ने प्रतियोगिताको विजेताले उपाधि सहित ५ लाख र दोस्रो हुने टोलीले २ लाख ५० हजार रुपैयाँ प्राप्त गर्नेछ ।