एनबिएलमा बुढानिलकण्ठको दोस्रो जित

काठमाडौं (हाम्रो खेलकुद) – राष्ट्रिय बास्केटबल लिग (एनबिएल) मा बिहीबार भएको एक मात्र खेलमा बुढानिलकण्ठ विजयी भएको छ । दोस्रो खेल जित्ने क्रममा बुढानिलकण्ठले हाउन्ड्स एकेडेमीलाई ७६–७३ ले हराएको छ ।

पहिलो क्वार्टर (२२–१९) बाट अग्रता लिएको बुढानिलकण्ठले त्यसलाई खेलको अन्त्यसम्म कायम राखेको थियो । चौथो तथा अन्तिम क्वार्टरमा हाउन्ड्सले २५ स्कोर गरेपनि हार टार्न सकेन ।

अन्तिम क्वार्टरमा बुढानिलकण्ठले १५ स्कोर मात्र गर्न सकेको थियो । दोस्रोे क्वार्टरमा ४०–३१ ले अगाडि रहेको बुढानिलकण्ठले तेस्रो क्वार्टरको अन्त्यमा ६१–४८ को अग्रता कायम राखेको थियो । १२ स्कोर गरेका बुढानिलकण्ठका प्रसिद्ध मगर खेलको म्यान अफ दि म्याच घोषित भए ।

लिगको ३ चरणको खेलको समाप्तीमा शीर्षस्थानाको रोयल स्पोर्टस सेन्टर र दोस्रो स्थानको टाइम्स क्लबको समान ६ अंक छ । तेस्रो स्थानमा रहेको बुढानिलकण्ठ र त्रिभुवन आर्मी क्लबको समान ५ अंक छ ।

गोल्डेनगेट बास्केटबल क्लब र कीर्तिपुर बास्केटबल क्लबको समान ४ अअंक छ । त्यस्तै विशाल मिलन केन्द्र र हाउन्ड्स एकेडेमीको समान ३ अंक छ ।