फाइभ नेसन्स बास्केटबल- लिग चरणमा नेपाल शीर्षस्थानमा

काठमाडौं (हाम्रो खेलकुद)– शीर्षस्थानमा रहँदै नेपाली राष्ट्रिय बास्केटबल टोलीले फाइभ नेसन्स पुरुष बास्केटबल च्याम्पियनसिपको लिग चरणको अन्त्य गरेको छ । पहिलो खेलमै हार बेहोरेको नेपालले त्यसपछिका सबै तीन खेलमा जित निकाल्दै शीर्षस्थानमा लिग चरणको अन्त्य गरेको हो ।

लिग चरणको आफ्नो खेलमा आइतबार नेपालले आयोजक माल्दिभ्सलाई ७५–६८ ले पराजित गरेको थियो । पहिलो क्वार्टरमा दमदार सुरुवात गरेको नेपाली टोलीले तेस्रो क्वार्टरसम्म उच्च प्रदर्शनलाई जारी राख्यो । चौथो क्वार्टरमा भने आयोजक टोली हाबी रह्यो ।

खेलमा नेपाल तीन क्वार्टरमा क्रशश २४–१२, २२–२१, १६–६ अगाडि र चौथो तथा अन्तिम क्वार्टरमा १३–२९ पछि रह्यो । पहिलो खेलमा भुटानसँग ६१–५५ ले पराजित भएकको नेपाल त्यसपछि पाकिस्तानलाई ६६–६२ ले र अर्को खेलमा बंगलादेशलाई ९०–६१ ले हराएको थियो ।

लिग चरणको समाप्तीमा ४ खेलमा ७ अंकसहित नेपाल शीर्षस्थान र समान अंकका साथ पाकिस्तान दोस्रो स्थानमा रह्यो । समान ६ अंकका साथ बंगलादेश तेस्रो र भुटान चौथो स्थानमा रह्यो । ४ अंक जोडेको माल्दिभ्स समूह चरणबाट बाहिरिएको छ । शीर्ष ४ टोलीले सेमिफाइनल खेल्नेछन् ।