काठमाडौं (हाम्रो खेलकुद) – नेपालले फाइभ नेसन बास्केटबल च्याम्पियनसिपको दोस्रो खेलमा पाकिस्तानलाई पराजित गरेको छ । दोस्रो हाफमा सुधारिएको प्रदर्शन गर्दै नेपालले प्रतियोगिताको पहिलो जित दर्ता गरेको हो ।

माल्दिभ्समा जारी प्रतियोगिताको दोस्रो दिन विहीबार नेपालले पाकिस्तानलाई ६६-६२ ले हराएको हो । पहिलो हाफमा ३३-२८ ले पछि परेको नेपाली टोलीले दोस्रो हाफमा भने राम्रो प्रदर्शन गर्यो ।

पहिलो क्वाटरमा नेपाली टोली १५-११ ले पछि रहेको थियो । दोस्रो क्वाटरमा पनि पाकिस्तानले ५ अंकको अग्रता कायम राख्यो । तेस्रो क्वाटरको अन्त्यमा नेपाल ४९-४५ ले अग्रता लिन सफल रहयो । नेपालले तेस्रो क्वाटरमा २१ अंक जोड्नु नै जितको मुख्य आधार थियो । उक्त क्वाटरमा पाकिस्तानले जम्मा १२ अंक मात्र जोड्न सक्यो ।

चौथो क्वाटरमा नेपालले अग्रता जोगाउँदै जित हासिल गरेको हो । यससँगै नेपालले पहिलो खेलमा भुटानसँग बेहोरेको हारलाई बिर्साउने प्रयास गरेको छ । नेपालको जितसँगै सेमिफाइनल पुग्ने सम्भावना पनि जीवित रहेको छ ।

नेपालका प्रशिक्षक नृपेश श्रेष्ठले टोलीका लागि यो जित निकै महत्त्वपूर्ण रहेको बताए । ‘शारीरिक रुपमा बलिया पाकिस्तानसँग हामीले निकै सोचेर खेल्नुपर्ने थियो । तेस्रो र चौथो क्वाटरमा हाम्रो आक्रमणले राम्रो प्रदर्शन गर्दा नतिजा हाम्रो पक्षमा आएको हो । यसले हाम्रो मनोबल उच्च भएको छ र आउने खेलमा राम्रो प्रदर्शन गर्नेछौं,’ उनले भने ।

यसअघि दिनको पहिलो खेलमा भुटानले नेपाललाई ६१-५५ र बंगलादेशले आयोजक माल्दिभ्सलाई ५२-४२ ले हराएका थिए । अब नेपालले शुक्रबार विश्राम लिनेछ । शनिबार नेपालको भेट बंगलादेश र आइतबार माल्दिभ्ससँग हुनेछ ।

लिग चरणको शीर्ष ४ टोलीले मंगलबार सेमिफाइनलमा खेल्नेछन् । विहीबार फाइनल खेल हुनेछ ।