एपिएफ पुरुष बास्केटबलको च्याम्पियन

पोखरा (हाम्रो खेलकुद) – नवौं राष्ट्रिय खेलकुद अन्तर्गत पुरुष बास्केटबलमा एपिएफ च्याम्पियन बनेको छ ।

प्रतियोगिताको फाइनलमा एपिएफले ८१-७९ स्कोरका साथ घरेलु टोली गण्डकी प्रदेशलाई पराजित गर्यो । थ्री अन थ्री तर्फको फाइनलमा भने आयोजक गण्डकीले एपिएफलाई २१- १६ स्कोरले पराजित गर्दै स्वर्ण पदक हात पार्यो ।

यसअघि आर्मीले बागमतीलाई ७८- ६० स्कोर सहित पराजित गर्दै कास्य पदक हात पारेको छ । थ्री अन थ्रीमा भने आर्मीले बागमतीलाई १९-१५ ले हरायो ।

त्यसअघि तनहुँमा भएको महिला बास्केटबल प्रतियोगितामा त्रिभुवन आर्मीले स्वर्ण पदक हात पारेको थियो ।

बुधबार भएको फाइनलमा आर्मीले बागमती प्रदेशलाई ४५–३० को अन्तरमा पराजित गर्दै स्वर्ण जितेको हो । पहिलो र दोस्रो क्वाटरमा आर्मीले १०–८ र १४–७ को अग्रता कायम गरेको थियो । तेस्रो चरणमा भने बागमतीले उत्कृष्ट खेल प्रदर्शन गरि १२–८ को अग्रता लियो । अन्तिम चरणमा वाग्मतीको कमजोर खेल प्रदर्शनको फाइदा उठाउदै आर्मीले १३–३ को फराकिलो अन्तर बनायो ।

यसै गरि थ्री बाइ थ्री महिला बास्केटबलमा एपिएफले स्वर्ण पदक हात पार्दा त्रिभुवन आर्मीले रजत पदक प्राप्त गर्यो । बागमती प्रदेशलाई ९–७ अंकको अन्तरमा गण्डकीले काँस्य पदक हात पारेको छ ।