काठमाडौं (हाम्रो खेलकुद) – आफ्नो पूर्व अध्यक्ष लामा टेण्डी शेर्पाको स्मृतिमा नेपाल बास्केटबल संघले खुला पुरुष तथा महिला बास्केटबल प्रतियोगिता आयोजना गर्ने भएको छ ।

त्रिपुरेश्वरस्थित राष्ट्रिय खेलकुद परिषद् (राखेप) को कभर्ड हलमा फागुन २ गतेबाट सुरु हुने प्रतियोगितामा पुरुषतर्फ १४ र महिलातर्फ ५ टोलीको सहभागिता रहने बिहीबार आयोजित पत्रकार सम्मेलनमा संघका कार्यवाहक अध्यक्ष भीमसिंह गुरुङले जानकारी दिए ।

पुरुषतर्फ बंगलादेशको नेभी टिम पनि सहभागिता रहने सम्भावना रहेको प्रतियोगिता संयोजक विकास शाहीले जानकारी दिए । नेभी टिम २०२१ को क्लब च्याम्पियन टिम भएको आयोजकले जनाएको छ ।

पुरुषतर्फ सहभागीलाई ४ समूहमा विभाजन गरी लिग कम नकआउट आधारमा प्रतिस्पर्धा गराइनेछ । महिलातर्फ राउन्ड रोविन लिग पद्धतिमा प्रतिस्पर्धा हुने र शीर्ष २ स्थानमा रहनेले टोलीले उपाधिका भिड्नेछन् ।

महिला/ पुरुष दुवैतर्फको विजेताले ५० हजार र दोश्रो हुने टोलीले २५ हजार रुपैयाँ प्राप्त गर्नेछन् । दुवै समूहका ‘मोस्ट भेलुएबल प्लेयर’ लाई जनही १० हजार रुपैयाँ प्रदान गरिने बताइएको छ । प्रतियोगितालाई हरेक वर्ष आयोजना गर्ने लक्ष्य रहेको संघका महासचिव नरेन्द्र थापाले बताए ।

स्व. शेर्पाले राष्ट्रिय खेलकुद परिषद् (राखेप) को उपाध्यक्ष र नेपाल ओलम्पिक कमिटीको महासचिवको जिम्मेवारी पनि सम्हालेका थिए । फागुन १२ गतेसम्म चल्ने प्रतियोगितामा साढे ८ लाख रुपैयाँ खर्च हुने अनुमान आयोजकको रहेको छ ।