काठमाडौं (हाम्रो खेलकुद) – दक्षिण एसियाली खेलकुद (साग) का स्वर्ण पदक विजेता गोपीचन्द्र पार्कीले बर्लिन म्याराथनमा आशा गरेभन्दा कमजोर प्रदर्शन गरेका छन् । जर्मनीको बर्लिनमा आइतबार भएको म्याराथन गोपीले २ घन्टा ४६ मिनेट २९ सेकेण्डमा पूरा गरे ।

गोपीले गत वर्ष नेपालगन्ज म्याराथनमा भन्दा कमजोर समय निकालेका हुन् । उनले नेपालगन्ज म्याराथनमा २ घण्टा १८ मिनेट ५९ सेकेन्डमा पूरा गरेका थिए । त्यसबेला नेपाल ओलम्पिक कमिटी (एनओसी) ले नेपालगन्ज म्याराथनलाई टोकियो ओलम्पिक छनोटको मान्यता दिएका थिए । तर, त्यो म्याराथन जितेपनि अन्तिम समयमा गोपीले टोकियो ओलम्पिक खेल्न पाएका थिएनन् ।

गत साता प्रशिक्षक सन्तोष श्रेष्ठसँग जर्मनी गएका गोपीको सहभागितामा लाग्ने हवाई खर्च राष्ट्रिय खेलकुद परिषदले बेहोर्ने बताइएको थियो । गोपी डेढ वर्ष अघि स्वोदशमा आयोजना भएको १३ औं सागका ५ हजार मिटर दौडका स्वर्ण पदक विजेता हुन् ।

गोपीको जर्मनी बसाईंको खर्च भने जर्मन नागरिक राल्फले बेहोरेको बताइएको थियो । उनको भिसा प्रक्रिया र त्यसमा लागेको खर्च पनि उनले नै बेहोरेका थिए । गोपी आबद्ध रहेको विभाग एपीएफकै प्रशिक्षक दिलमाया कार्कीको पहलमा यो सम्भव भएको हो ।

नेपालगन्ज म्याराथनको विजेता गोपीलाई नेपाल ओलम्पिक कमिटीले टोकियो २०२० मा सहभागिता पक्का रहेको भनेपनि अन्तिम समयमा उनले प्रतिस्पर्धा गर्न पाएका थिएनन् । एनओसीले भने आयोजकबाट नै उनको नाम युनिभर्सालिटी प्लेसेस अन्तर्गत कोटामा नपरेको बताएको थियो । उनको स्थानमा अन्तिम समयमा सरस्वती चौधरीले महिला १ सय मिटर दौडमा प्रतिस्पर्धा गरेकी थिइन् ।

टोकियोमा सहभागी हुन नपाएपनि गोपीले सन् २०२४ को पेरिस ओलम्पिकका लागि आफूले मिहिनेत गर्ने बताएका थिए । नियमित प्रशिक्षणमा रहेका गोपीले बर्लिन म्याराथनमा आफ्नो व्यक्तिगत कीर्तिमान सुधार्ने लक्ष्य राखेका थिए ।