काठमाडौं (हाम्रो खेलकुद) – टोकियो ओलम्पिक २०२० मा नाटकीय ढंगले सहभागिताबाट बन्चित भएका धावक गोपीचन्द्र पार्कीले विश्व प्रसिद्ध बर्लिन म्याराथनमा प्रतिस्पर्धा गर्ने भएका छन् ।

जर्मनीको बर्लिनमा हुने म्याराथनका लागि गोपी २१ सेप्टेम्बरमा त्यसतर्फ प्रस्थान गर्दैछन् । म्याराथन २६ सेप्टेम्बरमा आयोजना हुनेछ । गोपीको म्याराथन सहभागितामा लाग्ने हवाई खर्च राष्ट्रिय खेलकुद परिषदले बेहोर्ने भएको छ । गोपी १३ औं दक्षिण एसियाली खेलकुदको स्वर्ण पदक विजेता हुन् ।

त्यस्तै उनको जर्मनी बसाईंको खर्च भने जर्मन नागरिक राल्फले बेहोर्ने भएका छन् । उनको भिसा प्रक्रिया र त्यसमा लागेको खर्च पनि उनले नै बेहोर्ने भएका छन् । गोपी आबद्ध रहेको विभाग एपीएफकै प्रशिक्षक दिलमाया कार्कीको पहलमा यो सम्भव भएको हो । कार्की जर्मनीमा प्रशिक्षणमा रहँदा रहेको सम्बन्धका कारण यो सम्भव भएको थियो ।

यसबाहेक गोपीले सुदूरपश्चिमको दिनेश फाउन्डेसनबाट पनि मासिक १० हजार रुपैयाँ डाइट खर्च प्राप्त गर्दै आएका छन् । फाउन्डेसनले उनलाई अर्को ओलम्पिकको तयारीका लागि पेरिस २०२४ ओलम्पिकसम्मका लागि यो खर्च उपलब्ध गराउने बताएको छ ।

नेपालगन्ज म्याराथनको विजेता गोपीलाई नेपाल ओलम्पिक कमिटीले टोकियो २०२० मा सहभागिता पक्का रहेको भनेपनि अन्तिम समयमा उनले प्रतिस्पर्धा गर्न पाएका थिएनन् । एनओसीले भने आयोजकबाट नै उनको नाम युनिभर्सालिटी प्लेसेस अन्तर्गत कोटामा नपरेको बताएको थियो । उनको स्थानमा अन्तिम समयमा सरस्वती चौधरीले महिला १ सय मिटर दौडमा प्रतिस्पर्धा गरेकी थिइन् ।

टोकियोमा सहभागी हुन नपाएपनि गोपीले सन् २०२४ को पेरिस ओलम्पिकका लागि आफूले मिहिनेत गर्ने बताएका थिए । नियमित प्रशिक्षणमा रहेका गोपीले बर्लिन म्याराथनमा आफ्नो व्यक्तिगत कीर्तिमान सुधार्ने लक्ष्य राखेका छन् । उनले नेपालगन्ज म्याराथनमा २ घण्टा १८ मिनेट ५९ सेकेन्डमा उक्त कीर्तिमान राखेका थिए ।