नेपालगन्ज (हाम्रो खेलकुद) – नेपाली भुमिमा भएको म्याराथनमा उत्कृष्ट समय निकाल्न सफल विभागीय नेपाल एपिएफका धावक गोपीचन्द्र पार्कीलाई आर्शिवाद पेन्ट्सका किरण कार्कीले आफ्नो घोषणा बमोजिम पुरस्कार हस्तान्तरण गरेका छन् ।

कार्कीले गोपीचन्द्रलाई २५ हजार रुपैयाँको चेक हस्तान्तरण गरेका हुन् । उनले शुक्रबार नेपाली भुमिमा कीर्तिमान बनाउन सफल भए २५ हजार रुपैयाँ प्रोत्साहन पुरस्कार दिने घोषणा गरेका थिए । २५ खेलाडीको सहभागितामा शनिबार नेपालगन्जमा भएको म्याराथनमा पार्की च्याम्पियन बन्ने क्रममा उनले निर्धारित ४२ दशमलव १९५ किलोमिटर दुरी २ घन्टा १८ मिनेट ५९ सेकेन्डमा पुरा गरेका थिए ।

नेपाली खेलाडीले स्वदेशमा दौड पूरा गरेको यो उत्कृष्ट समय हो । यसअघि भुमिराज राई २ घन्टा २० मिनेट ४० सेकेन्डको उत्कृष्ट समय थियो । नेपालमै आठौं राष्ट्रिय खेलकुदमा आर्मीका कृष्ण बस्नेतले २ गहनता १७ मिनेट ३३ सेकेन्डमा दुरी पूरा गरेपनि उक्त रुट अधिकारिक नभएकोले मान्यता नपाएको मुख्य प्रशिक्षक चन्द्र गुरुङले जानकारी दिए ।

छैटौं धारा नेपालगन्ज म्याराथन अर्काे वर्ष जापानमा आयोजना टोकियो ओलम्पिक छनोटको प्रतियोगिताको रुपमा रहेकाले गोपीले टोकियो ओलम्पिकका लागि पनि छनोट हुन सफल भएका छन् ।

आर्शिवाद पेन्ट्सका किरण कार्कीले ओलम्पिकमा उत्कृष्ट समय निकाल्न सफल भएको अवस्थामा ५० हजार रुपैया प्रदान गर्ने घोषणा गरेका छन् । नेपाली भुमिमा उत्कृष्ट नतिजा निकाल्न सफल गोपीले ओलम्पिकमा सहभागिता नै ठुलो रहेको बताए । उनले ओलम्पिकमा पदक जित्नुभन्दा पनि आफ्नो उत्कृष्ट समय निकाल्नु रहेको र नेपालको उत्कृष्ट समयलाई आफ्नो नाममा लेखाउन प्रयत्न गरिने बताए ।