काठमाडौं (हाम्रो खेलकुद) – विभागीय नेपाल एपीएफ क्लबकी कान्छीमाया कोजुले काठमाडौं म्याराथनमा ह्याट्रिक उपाधि जितेकी छिन् । शनिबार बिहान भएको १३औं संस्करणको म्याराथनमा कान्छीले निर्धारित दुरी २ घन्टा ५७ मिनेट २७ सेकेन्डमा पुरा गर्दै ह्याट्रिक उपाधि जितेकी हुन् ।

उनले यसअघिको लगातार दुई संस्करणमा च्याम्पियन बनेकी थिइन् । काठमाडौं म्याराथनमा समग्रमा उनको यो पाँचौ उपाधि हो । दोस्रो स्थानमा आर्मीकी सरिता वासीले ३ घण्टा १९ मिनेट ७ सेकेन्डमा पूरा गरिन् । निर्जला ताम्राकारले ३ घण्टा ४५ मिनेट ४७ सेकेन्डमा दौड पूरा गर्दै तेस्रो स्थान हासिल गरिन् ।

पुरुषतर्फ विभागीय त्रिभुवन आर्मी क्लबले वर्चस्व जमाएको छ ।   नरेन्द्र सिंह रावल च्याम्पियन बनेका छन् । दोस्रो र तेस्रो स्थान पनि आर्मीकै खेलाडीले जितेका छन् ।

नरेन्द्रले निर्धारित दुरी २ घन्टा ३३ मिनेट १० सेकेन्डमा पूरा गर्दै च्याम्पियन बने । आर्मीकै वेद बहादुर सुनारले निर्धारित दुरी २ घन्टा ३४ मिनेट २० सेकेन्डमा पुरा गर्दै दोस्रो स्थान हासिल गरे । आर्मीकै ज्ञान प्रसाद भट्टराईले २ घन्टा ३४ मिनेट ४५ सेकेन्डमा पुरा गर्दै तेस्रो स्थान हासिल गरे ।

त्रिुपेरश्वरबाट सुरु भएको म्याराथन, थापाथली, कुपण्डोल, पाटन गेट, चाकुपाट, युएन पार्क, शंखमुल, बानेश्वर, तीनकुने, जडिबुटी, गठ्ठाघर, सुर्यविनायक चोकबाट राम मन्दिर, दौमदि साः कोठा, सिडियो कार्यालय, औधोगिक क्षेत्री हुँदै सिधा पुरानो ठिक, भीमसेन मन्दिरको दाहिनेबाट ठिमी बोडे सडकहुँदै पेप्सीकोला, जडिबुटी, तीनकुगर्ने एयरपोर्ट, गौशाला, पशुपति, रातोपुल, नक्साल, भाटभटेनी, बालुवाटार, लैनचौर, नारायणहिटी, दरबारमार्ग, घन्टाघर, भद्रकाली, सहिद गेट हुँदै त्रिपुरेश्वरस्थित दशरथ रंगशाला आएर टुंगिएको थियो ।

विजेता नरेन्द्रले ५० हजार रुपैया हात पारे । दोस्रो भएको बेद बहादुर सुनारले २० हजार तथा तेस्रो भएको ज्ञान प्रसाद भट्टराइले १५ हजार रुपैया हात पारे । महिलातर्फ कान्छिले ५० हजार, सरिताले २० हजार र निर्जलाले १५ हजार रुपैयाँ प्राप्त गरे ।