नेपालगन्ज (हाम्रो खेलकुद) – धारा नेपालगञ्ज म्याराथनको पाँचौं संस्करणका लागि सहकार्य गर्ने संस्था थपिएका छन् । शनिबार हुने धारा नेपालगन्ज म्याराथनको लागि निदान डाइग्नोस्टिक एण्ड हेल्थ सेन्टरले पनि दुई बर्षे सहकार्यको सम्झौता गरेको छ ।

क्रिएटिभ ह्याण्ड्सले सरकार र सशस्त्र द्वन्द्वरत तत्कालिन माओवादीका बीचमा मंसीर ५ गते भएको बिस्तृत शान्ति सम्झौताको स्मरण गर्दै हरेक वर्ष नेपालगञ्ज म्याराथन आयोजना हुने गरेको छ । निदानले धारा नेपालगन्ज म्याराथनमा विजयी सम्पुर्ण खेलाडीको निशुल्क सम्पुर्ण शरिरको चेकजाँचको सुविधा गर्नेछ । त्यसैगरी सम्पुर्ण सहभागिहरुलाई पनि बिशेष छुटको सेवा प्रदान गरेको छ ।

विभिन्न उमेरसमुहमध्ये ६० बर्षमाथिकालाई पचास प्रतिशत, ४० देखि ५९ बर्ष उमेरसम्मलाई ४० प्रतिशत र ४० बर्षसम्मलाई २५ प्रतिशत छुट दिने आयोजक क्रिएटिभ ह्याण्ड्सका अध्यक्ष टीएस ठकुरीले मंगलबार जारी गरेको विज्ञप्तीमा उल्लेख छ । । म्याराथन आयोजक र संलग्न अफिसियलले पनि निदानको सेवा पाउनेछन् ।

म्याराथनलाई धारा शुद्ध तोरीको तेलले मुख्य प्रायोजन गरेको छ । त्यस्तै सह प्रायोजकका रुपमा रहेका मध्ये इन एसोसिएसन विथ आर्शिवाद पेन्ट्स र पावर्ड बाई राष्ट्रिय बाणिज्य बैंक आबद्ध भइसकेका छन् । पश्चिम नेपालको प्रमुख व्यापारिक केन्द्र नेपालगञ्ज जातीय, धार्मिक तथा साम्प्रदायिक विविधता भएर पनि एकताको सूत्रमा बाँधिएको सद्भावको शहरका रुपमा परिचित छ ।

पुरुष खुल्लातर्फ म्याराथन, महिलाको हाफ म्याराथन, १० किलोमिटर खुल्ला पुरुष, ५ किलोमिटर, ५ किलोमिटर स्कुल स्तरीय छात्र तथा ३ किलोमिटर छात्रा दौड समावेश गरिएको छ । त्यसैगरी ८ देखि १२ बर्ष उमेरसमुहको पनि दौड राखिएको छ भने शारीरिक रुपले अशक्तहरुको लागि पनि दौड स्पर्धा समेटिएको छ ।

यस बर्षदेखि २ किलोमिटरको कर्पोरेट रन पनि राखिएको छ । यसमा जनप्रतिनिधि, चिकित्सक, इन्जिनियर, प्राध्यापक, वकिल, शिक्षक, पत्रकार तथाबिभिन्न पेशा र व्यवसायीहरुले सहभागिता जनाउनेछन् । खुल्ला म्याराथनतर्फ शीर्ष आठ जना तथा हाफ म्याराथनमा शीर्ष ६ जनालाई नगद तथा आकर्षक उपहारबाट पुरस्कृत गरिनेछ । अन्य सबै विधामा नगद पुरस्कार दिइने विज्ञप्तीमा उल्लेख छ । कर्पोरेट रनका विजेतालाई सरप्राइज पुरस्कार प्रदान गरिनेछ ।

नेपालगन्ज उपमहानगरपालिका नजिक बीपीचोकदेखि सुरु भइ कोहलपुर चौराहदेखि उत्तरतर्फ पुगी सोही रुट हुँदै पुनःबीपीचोकमा पुरा हुने म्याराथनमा राष्ट्रियस्तरका धावकहरु सहभागि हुनेछन् । त्यस्तै, जुम्ला, कालिकोट लगायतका कर्णालीकाजिल्लाहरु र प्रदेश ५, ६ र ७ का खेलाडीहरुले भागलिदैआएका छन् ।

नेपालगन्ज म्याराथनको पहिलो संस्करणमा नेपाली सेनाका होमलाल श्रेष्ठ, दोस्रोमा सेनाकै कृष्ण बस्नेत, तेस्रोमा जुम्लाका दुर्ग बुढा र चौथो संस्करणमा नेपाल पुलिस क्लबका भुमिराज राई विजेता भएका थिए भने हाफ म्याराथनमा नेपालकी नम्बर एक धाविका कान्छीमाया कोजु दुई संस्करणमा विजेता भइसकेकी छिन् । यसपटक सबै विधामा नगद पुरस्कार बृद्धि गरिने आयोजकले जनाएको छ ।