काठमाडौं (हाम्रो खेलकुद) – पूर्व खेलाडी तीर्थ ओली नेपालगन्ज म्याराथनको अन्तर्राष्ट्रिय संयोजक तोकिएका छन् । क्रिएटिभ ह्याण्ड्सको आयोजनामा नेपालगन्ज म्याराथनको पाँचौं संस्करण मंसिर ७ गते आयोजना हुँदैछ ।

नेपालगञ्ज म्याराथनलाई विदेशमा समेत चर्चित बनाउन वलीलाई संयोजक बनाइएको आयोजक संस्थाका अध्यक्ष टि एस ठकुरीले प्रेस विज्ञप्तीमार्फत जनाएका छन् । नेपालगञ्ज निवासी वली लामो र छोटो दुरीका धावक हुन् । उनी अहिले जर्मनीमा बस्दै आएका छन् ।

सन् २००४ मा १५०० मिटर र १० हजार मिटरमा जुनियर राष्ट्रिय च्याम्पियन भइसकेका वली २००५÷०६ मा १५०० मिटर (सिनियर दौड)मा तेस्रो भएका थिए । २००२ देखि २००६ सम्म नेपालमा राष्ट्रिय प्रतियोगिता खेलेका वलीले २००६ देखि २०१५ सम्म जर्मनीमा भएका लामो र छोटो दुरीका प्रतियोगितामा भाग लिइसकेका छन् ।

खेल क्षेत्रको मर्म बुझेका वलीलाई अन्तर्राष्ट्रिय संयोजक बनाउन पाउँदा खुसीलागेको ठकुरीले बताएका छन् । सरकार र सशस्त्र द्वन्द्वरत तत्कालिन माओवादीका बीचमा मंसिर ५ गते भएको बिस्तृत शान्ति सम्झौताको स्मरण गर्दै हरेक वर्ष नेपालगञ्ज म्याराथन आयोजना हुँदै आएको छ ।

पश्चिम नेपालको प्रमुख व्यापारिक केन्द्र नेपालगञ्ज जातीय, धार्मिक तथा साम्प्रदायिक विविधता भएर पनि एकताको सूत्रमा बाँधिएको सद्भावको शहर भनेर चिनिन्छ ।

सामाजिक एकताको प्रतिक खेलकुदमार्फत शहरलाई चिनाउने उद्देश्य रहेको नेपालगञ्ज म्याराथनले कोहलपुर र नेपालगञ्जलाई जोड्ने शसक्त माध्यम बन्ने आयोजकको बुझाई छ ।

नेपालगञ्जलाई महानगर बनाउने अवधारणाको चर्चा हुँदा सरकारले नेपालगञ्ज र कोहलपुर शहर जोड्ने नीतिलाई म्याराथन आयोजनाले थप बल पुग्ने विश्वास आयोजकको छ ।