काठमाडौं(हाम्रो खेलकुद) – त्रिभुवन आर्मी क्लबका होमलाल श्रेष्ठले चौथो संस्करणको लुम्बिनी शान्ति म्याराथनको उपाधि जितेका छन् । बिहिबार लुम्बिनीमा भएको म्याराथनमा होमलालले आर्मीकै हरी कुमार रिमाललाई पछि पार्दै उपाधि जितेका हुन् ।

उपाधि जित्ने क्रममा होमलालले निर्धा्रित दुरी २ घण्टा ५३ मिनेट १३ सेकन्डमा पुरा गरे । होमलालले लगातार दोस्रो पटक लुम्बिनी म्याराथनको उपाधि जितेका हुन् । उपाधिसँगै होमलालले ‘लुम्बिनी अशोक पिस पुरस्कार’ स्वरूप नगद १ लाख प्राप्त गरे ।

दोस्रो भएका हरी कुमार रिमालले २ घण्टा ५४ मिनेट ५३ सेकेन्डमा दौड पुरा गरे । हरिले ‘कपिलवस्तु हुएन सान पुरस्कार’ स्वरूप ७५ हजार नगद हात पारे । म्याराथनतर्फ आर्मीकै खगेन्द्र भाट तेस्रो भए । खगेन्द्रले २ घण्टा ५७ मिनेट ३४ सेकेन्डको समय निकाले । उनले ‘मायादेवी गार्डेन उत्त्थान पुरस्कार’ स्वरूप ५० हजार प्राप्त गरे ।

म्याराथनमा विदेशी धावकसहित ३५ खेलाडीको सहभागिता रहेको थियो । जसमा ३ भिक्षुसहित १३ जना विदेशी खेलाडी रहेका थिए । म्याराथन सिद्धार्थ गौतमले बुद्धको रुपमा आफ्नो जन्मभूमि फर्केर बाबु राजा शुद्धोधनलाई भेटेको स्थान कुदानबाट सुरु भई गोटिहवा, कपिलवस्तु, बाणगंगा, तिलौराकोट, निग्लिहवा, अरोरकोट र दोहनी हुँदै मायादेवी मन्दिरमा आएर सकिएको थियो ।

प्रतियोगिता अन्तर्गत २१ किमिको हाफ म्याराथनको उपाधि भारतीय सेनामा कार्यरत तिर्थ पुनले आफ्नो बनाए । तिर्थको पनि लगातार दोस्रो पटक उपाधि जितेका हुन् । उपाधि जित्ने क्रममा तिर्थले १ घण्टा ७ मिनेट ३५ सेकेन्डमा दौड पुरा गरे । उपाधिसंगै तिर्थले ५० हजार प्राप्त गरे ।

हाफ म्याराथनतर्फ दोस्रो भएका आर्मीका राम जी बस्नेतले १ घण्टा ७ मिनेट ५४ सेकेन्डको समय निकाले । उनले ३० हजार प्राप्त गरे । तेस्रो भएका आर्मीका टिका राम कट्टेलले १ घण्टा ७ मिनेट ५८ सेकेन्डको समय निकाले । तेस्रो भएका टिका रामले २५ हजार प्राप्त गरे ।

हाफ म्याराथनमा ५ भिक्षु ७ विदेशीसहित ४५ खेलाडीले सहभागिता जनाएका थिए । हाफ म्याराथन मायादेवीको सुत्केरी मार्ग दोहनीबाट सुरु भई माया देवी मन्दिर आएर समापन भएको थियो ।

पाँच किमी दौडको उपाधि सुनिल थापाले जिते । उनले १७ मिनेट ५ सेकेण्डमा दौड पुरा गरे । दोस्रो भएका संजय राईले १७ मिनेट ७ सेकेन्डमा दौड पुरा गर्दा तेस्रो भएका सतेन्द्र यादवले १७ मिनेट २४ सेकेन्ड दौड पुरा गरे ।पाँच किमिको दौड बिजेताले १० हजार, दोस्रोले ७ हजार र तेस्रोले ५ हजार प्राप्त गरे ।