बाँके (हाम्रो खेलकुद) – दोस्रो राष्ट्रिय जुनियर एथलेटिक्स प्रतियोगिता बुधवारबाट खजुरा गाउँपालिका–२, सीतापुरस्थित शुक्र माविमा सुरु भएको छ । विभिन्न विधाका ५ खेल भएका छन् । पुरुषतर्फको एक हजार ५ सय मिटर दौडमा मध्यपश्चिमाञ्चलका माधव चौधरी विजयी भए ।

माधवले ४ मिनेट २७. १ सेकेन्डमा दौड पूरा गरि प्रथम हुँदा मध्यमाञ्जका सुभाष थापा ४ मिनेट २७.४ सकेन्डमा दुरी पूरा गरि दोस्रो भए । उक्त खेलमा सुदूर पश्चिमाञ्चलका सुनिल सुनार ४ मिनेट २७.८ सेकेन्ड दुरी पूरा गरि तेस्रो भए ।

बुधवार नै भएको महिलातर्फको १५ सय मिटर दौडमा मध्यपश्चिमाञ्चलकी चन्द्रा घर्ती प्रथम भइन् । उनले ६ मिनेट ३५.४ सेकेन्डमा् दुरी पार गरिन् । पश्चिमाञ्चलकी सुस्मिता भट्टराईले ६ मिनेट ४३.६ सेकेन्डमा दुरी पार गरि दोस्रो र सुदूरपश्चिमाञ्चलकी रेखा चन्दले ६ मिनेट ५२ सेकेन्डमा निर्धारित दुरी पार गरि तेस्रो भइन् ।

पुरुषतर्फको ४ सय मिटर दौडमा सुदूरपश्चिमाञ्चलका केशर रावल प्रथम, सुदूरपश्चिमकै राजेश बहादुर चौधरी दोस्रो र मध्यमाञ्चलका छिरिङ लामा तेस्रो भए । त्यसैगरि, महिलातर्फको ४ सय मिटर दौडमा पश्चिमाञ्चलकी कल्पना श्रेष्ठ प्रथम भइन् भने मध्यपश्चिमाञ्चलकी पूजा चौधरी दोस्रो र सुदूरपश्चिमाञ्चलकी अनिता भुल तेस्रो भइन् ।

शटपुट महिला तर्फको खेलमा पश्चिमाञ्चलकी सुमित्रा थापा प्रथम भएकी छन् । उनले ८ दशमलव ४५ मिटर रेकर्ड राख्दा पश्चिमाञ्चलकी अस्मिता सेर्पाली दोस्रो र सुदूरपश्चिमकी मिना धामी तेस्रो भइन् । सेर्पालीले ८ मिटर ४३ मिटर पर फालिन् भने धामीले ८ दशमलव १४ मिटर दुरी फाल्न सफल भइन् ।

पुरुषतर्फको लङजम्पतर्फ मध्यमाञ्चलका भुवन महतो प्रथम, मध्यपश्चिमाञ्चलका सुशील केसी दोस्रो र पूवाञ्चलका सुरज माझी तेस्रो भएको आयोजक बाँके जिल्ला एथलेटिक्स संघले जनाएको छ ।

यसैबीच, खेलकुद प्रतियोगितालाई सहरभन्दा गाउँ केन्द्रीत गर्नुपर्ने सुझाव सम्बद्धले दिएका छन् । दोस्रो जुनियर एथलेटिक्स प्रतियोगिता उद्घाटन कार्यक्रममा सम्बद्धहरुले सहरमा भन्दा गाउँबाट खेलाडी उत्पादन हुने भएकोले प्रतियोगितालाई गाउँ केन्द्रीत गर्दै लैजानुपर्ने बताएका हुन् ।