काठमाडौं (काठमाडौं) – नेपाली सेनाको आयोजनामा तेस्रो संस्करणको प्रधान सेनापति तेस्रो खुुला म्याराथन माघमा हुने भएको छ । सेनाले बिहिबार राजधानीमा पत्रकार सम्मेलनको आयोजना गर्दै तेस्रो संस्करणको प्रतियोगिता शिवरात्रीको दिन आगामी माघ २७ गते आयोजना गर्न लागिएको जानकारी गराएको छ ।

नेपाली सेनाले ‘रन फर फन’ को रुपमा दुईवर्ष अघिबाट म्याराथन आयोजना गरेको थियो । म्याराथन सैनिक मञ्च, टुडिंखेलबाट शुरु भई काठमाडौं उपत्यकाको भक्तपुर, महाराजगञ्ज लगायत विभिन्न स्थान भई सोही स्थान पुगेर टुंगिने बताइएको छ । म्याराथनमा (४२.१९५ किलामिटर), पुरुष खुला, हाफ म्याराथन महिला/पुरुष खुल, १० किलोमिटर सैनिक सहचारी/विदेशी र सैनिक अधिकृतहरुको प्रतिस्पर्धा हुनेछ ।

त्यस्तै ५ किलोमिटर (सैनिक बिद्यालयका छात्र/छात्रा र नेपाली सेनाका सकल दर्जाका छोराछोरीहरु), ५ किलोमिटर वाकाथन (नेपाली सेना, सशस्त्र प्रहरी बल, नेपाल प्रहरी र निजामती उच्च पदाधिकारीहरु) गरी पाँच विधाहरु समावेश गरिएको छ । पुरुष म्याराथनको विजेताले १ लाख रुपैया प्राप्त गर्नेछ । दोस्रो हुनेले ५० हजार, तेस्रोले २५ हजार, चौथोले १५ हजार, पाचौ र छैटौ हुनेले क्रमशः ७ हजार र ५ हजार प्राप्त गर्नेछन् ।

यस्तै हाफ म्याराथन पुरुषतर्फ ४५ वर्षमुनि र महिलातर्फको ४५ वर्ष मुनिको विजेताले २५ हजार रुपैया प्राप्त गर्नेछ । दोस्रो हुनेले १०–१० हजार र तेस्रो हुनेले समान ५–५ हजार रुपैया प्राप्त गर्नेछन् । यस्तै पुरुषतर्फको ४५ वर्ष माथि र महिलातर्फको ४५ वर्षमाथिको विजेताले समान १५ हजार रुपैयाँ प्राप्त गर्नेछन् । दोस्रो र तेस्रो हुनेले क्रमश  : १५ हजार, १० हजार र ५ हजार प्राप्त गर्नेछन् ।

यस्तै पुरुष विदेशी र महिला दुवै तर्फको शीर्ष तीनमा आउनेले समान ४ हजार रुपैयाँसहित ट्रयाकसुट र लेटर अफ एप्रिसिएसन प्राप्त गर्नेछन् । ५ किलोमिटर स्कुल छात्र र छात्राको विजेताले समान ७ हजार रुपैयाँ गर्नेछन् । दुवै तर्फको दोस्रो र तेस्रो हुनेले क्रमश ५ हजार र ३ हजार प्राप्त गर्नेछन् । अघिल्लो संस्करणका पुुरुषतर्फ एपिएफका क्लबका गोपीचन्द्र पार्की र महिला तर्फ विश्वरुपा बुढाले उपाधि जितेका थिए । पहिलो संस्करणको उपाधि सेनाका हरि रिमालले जितेका थिए ।