काठमाडौं (हाम्रो खेलकुद)– लिग लिग कोट विकास अभियानको आयोजनामा गोरखामा आठौं संस्करणको लिगलिगे दौड यसपटक असोज ९ गते हुने भएको छ । आयोजक लिग लिग कोट विकास अभियानले शनिबार काठमाडौंमा पत्रकार सम्मेलनको आयोजना गर्दै आठौं संस्करण आयोजनाको जानकारी दिएको हो ।

दौड चेपेघाटबाट शुरु भएर लिग लिग दरवारमा पुगेर टुंगिने छ । प्रतियोगितामा महिला र पुरुष दुवैतर्फ गरि करिव १ सय ५० खेलाडीले प्रतिस्पर्धा गर्र्ने लिग लिग विकास अभियानका अध्यक्ष पूर्ण बहादुर रानाले जानकारी दिए । यसपटक पुरुषतर्फ यसअघिका उपाधि विजेता भुमिराज राई, हरिकुमार रिमाल र अनिष थापामगर र महिलातर्फ कान्छीमाया कोजु र मिरा राईले पनि प्रतियोगितामा सहभागिता जनाउने आयोजकले जानकारी गराए ।
दौडको विजेताले ५० हजार ५ सय ५ सहित श्रीपेच,दोस्रो हुनेले ३० हजार ३ सय ५, तेस्रोले २० हजार २ सय ५, चौथोले १० हजार १ सय ५ रुपैया प्राप्त गर्नेछन् । यस्तै पाँचौ देखि आठौ हुनेले क्रमशः ५ हजार ५, ४ हजार ५, ३ हजार ५ र २ हजार ५ प्राप्त गर्नेछन् । यस्तै समावेशी महिला र स्थानीय विजेताले १५ हजार ५, दोस्रो हुनेले १० हजार ५ र तेस्रो हुनेले ५ हजार ५ प्राप्त गर्ने आयोजकले जनाएको छ ।

दौड प्रतियोगिता सञ्चालन गर्न करिव १४ लाख ४४ हजार ८ सय खर्च हुने आयोजकले अनुमान गरेको छ । खर्च रकम राखेप, नगरपालिका र अपुग रकम चनद सहयोगबाट पूरा गरिने लिग लिग बिकास अभियानका अध्यक्ष रानाले जानकारी दिए । ऐतिहासिक महत्व बोकेको लिग लिग दौड विस १६०४ बाट शुरु भएको मानिन्छ । लिग लिग दौड तत्कालीन समयमा हरेक वर्ष लिग लिग कोटको राजा छान्ने अभिप्रायले गरिने इतिहास छ ।