पूर्वाञ्चलमा आयोजना हुने सातौ राष्ट्रिय खेलकुद प्रतियोगिता २०७२ अन्तरगत हुने चौथो राष्ट्रिय ट्राइयाथलन प्रतियोगिता कास्कीको वेगनाश तालमा शनिबार हुने भएकोछ ।

प्रतियोगितामा ट्राईयाथलन अन्तरगत स्टान्डर्ड वा ओलम्पिक डिसिप्लिन (१ हजार ५ सय मिटर पौडी, ४० कि.मि. साईक्लिङ्ग र १० कि.मि. दौड), स्प्रिन्ट (७५० मिटर पौडी, २० कि.मि. साईक्लिङ्ग र ५ कि.मि. दौड) र डुवाथलन (५ कि.मि. दौड, २० कि.मि. साईक्लिङ्ग र २.५ कि.मि. दौड)  गरि तीन विधामा प्रतिस्पर्धा गराईने भएको छ ।

प्रतियोगिता भारतको गुहाटी र आसाममा माघ २३ देखि आयोजना हुने दक्षिण एशियाली प्रतियोगिताको लागि छनोट प्रतियोगिता समेत रहनुका साथै मंसिर महिनामा पानीको चिसोपनमा अत्याधिक बृछि हुने भएकोले र पूर्वमा प्रतियोगिता संचालनको लागि आवश्यक ताल वा पोखरी नभएका कारण वेगनाश तालमा प्रतियोगिता संचालन गर्न लागिएको नेपाल ट्राईयाथनल संघका महासचिव निलेन्द्र राज श्रेष्ठले जनाएका छन् । वेगनाश तालमा नेपाल ट्राईयाथलन संघले विगत तीन बर्ष देखि दक्षिण एशियाली च्याम्पियनसिप र राष्ट्रिय प्रतियोगिता सफलतापूर्वक सम्पन्न गर्दै आईरहेको छ । हाल उक्त तालको पानीमा पौडीको लागि आवश्यक तातोपन रहेको र यस भन्दा पछाडी प्रतियोगिता गर्नु परेमा पानीको चिसो पन बढ्न जानाले प्रतियोगिता आयोजना गर्न नसकिने र दक्षिण एशियाली खेलकुद प्रतियोगितामा पदकको सम्भावना भएकोले तयारी प्रशिक्षणमा पर्याप्त समय नहुने भएका कारणले पनि प्रतियोगिता यसै समयमा गर्नु परेको समेत महासचिव श्रेष्ठले जानकारी गराए ।

प्रतियोगितामा पााच विकास क्षेत्र र दुई विभागिय टोली नेपाली सेना र सशस्त्र प्रहरी बलका ३० पुरुष र १० महिला गरि ४० खेलाडीको सहभागिता रहने छ ।