काठमाडौं (हाम्रो खेलकुद)-  विश्वकै सबैभन्दा चिसो स्थान नर्थ पोलमा भएको एफडब्लु डि नर्थ पोल म्याराथनका पदक विजेता खेलाडी सम्मानित भएका छन् । दुवै पदक विजेता खेलाडीलाई बतासे ट्रेल्सले जनही १०–१० हजार र सम्मान पत्रले मंगलबार सम्मानित गरेको हो ।

खेलाडीहरुलाई नेपाल ओलम्पिक कमिटिका महासचिव लामा टेण्डी शेर्पा, बतासे ट्रेल्सका अध्यक्ष सुजन तामाङ र सिन्धुपाल्चोक जिल्ला खेलकुद बिकास समितिका अध्यक्ष शिव देउजाले सम्मानित गरे । सम्मान कार्यक्रमपछि ओलम्पिक कमिटिका महासचिव लामा टेण्डी शेर्पाले नेपाली खेलाडीको एचिभमेन्ट राष्ट्रको लागि गौरवको विषय रहेको बताउदै सरकारको ध्यानाकर्षणका लागि राष्ट्रिय खेलकुद परिषदमार्फत खेलकुद मन्त्रालयमामा पेश गर्ने बताए । यस्तै महासचिव शेर्पाले टोकियो ओलम्पिकका लागि तीनवर्षको अवधिमा योजना बनाएर अघि बढे ओलम्पिकमा नेपालले पनि पदक जित्ने सम्भावना रहेको बताए ।

अप्रिल ९ मा भएको म्याराथनमा भीम बहादुर गुरुङले दोस्रो तथा समिर तामाङले तेस्रो स्थान हात पारेका थिए । भीमले निर्धारित दुरी ४ घण्टा १८ मिनेट र समिर तामाङले ४ घण्टा ३१ मिनेटमा निर्धारित दुरी पुरा गरेका थिए । सम्मानपछि समिर तामाङले सम्मानले अझै हौसला मिल्ने बताए । उपाधि जितिकेपछि नेपाली खेलाडी भन्न पाउदा खुशी लागेको उनले थपे । यस्तै अर्का धावक भीमले सम्मानले ट्रेल रेसमा यति धेरै उपाधि जित्दा सरकारी पक्षको कुनै ध्यान नपुग्दा दुःख लागेको प्रतिक्रिया दिए ।