काठमाडौं (हाम्रो खेलकुद) – अमेरिकाको आउट साइड म्यागेजिनको लागि नेपाली अल्ट्रा धाविका मिरा राईले फोटो सुट गराइकी छिन् । नेसनल ज्योग्राभी च्यानलको एड्भेन्चररमा अफ दी एयर पिपल्स च्वाइस अवार्ड २०१७ की विजेता रहेकी मिरालाई फोटो सुट र अन्र्तवार्ताका लागि दुई साता अघि अमेरिका पुगेकी थिइन् । उनको अमेरिका यात्राको सबै खर्च आउट साइडले नै बेहोरेको मिराले बताइन् । 

‘मेरो लागि यो विल्कुल नयाँ अनुभव रह्यो ’ मिराले अमेरिकाबाट टेलिफोनमा हाम्रो खेलकुदलाई भनिन्,‘यो मेरो र देशकै लागि पनि ठूलो अवसर थियो । यहाँ अन्य नाम चलेका खेलाडीसँग पनि अनुभव साट्ने अवसर मिल्यो । रमाइलो अनुभव भयो ।’
नेसनल ज्योग्राभी च्यानलले केही महिना अघि विश्वका दस जनालाई मनोनित गरेको अवार्डका लागि अनलाइन भोटिङका आधारमा मिरा विजयी भएकी थिइन् ।

अवार्ड जितेपछि आउटलुकको अन्तवार्ताको लागि बोलाएको जानकारी दिदै मिराले भनेकी थिइन् ‘ अवार्डले मेरो मात्र होइन देशकै इज्जत बढेको महसुस गरेको छु ।

विश्वमै चर्चित म्यागेजिनले बोलाउँदा एउटा खेलाडीका नाताले जति खुसी लागेको छ, देशको समेत प्रतिनिधित्व गर्ने भएकाले त्यसमा गर्व महसुस भइरहेको छ । ’ सन् १९७७ बाट प्रकाशित आउटसाइडले आउटडोर खेलकुद, स्वास्थ्य, सहासिक खेललगायतलाई समेट्ने गरेको छ ।
अल्ट्रा रेस सुरु गरेको छोटो समयमा सफलताका कारण चर्चा कमाएकी मिराले गतबर्ष घुँडाको शल्यक्रिया भएयता कुनै रेसमा भाग लिएकी छैनन् । अहिले उनले फिजियो सुरु गरेको जनाउँदै अब चार पाँच महिनापछि सक्रिय रेसमा फर्कने बताइन् ।
माओवादी सेना समायोजनमा अयोग्य भएपछि उनले अल्ट्रा रेस सुरु गरेकी थिइन् । भोजपुरकी मिराले पहिलो पटक काठमाडौंमा भएको अल्ट्रा हिमालयन आउटडोर दौडमा भाग लिइन् ।

दुई बर्षअघि उनको अन्तराष्ट्रिय यात्रा भने इटलीबाट सुरु भएको वथियो । गत बर्ष फ्रान्समा मोन्ट ब्लान्स नामक ८० किलोमिटर दुरीको अल्ट्रा म्यारथन जितेपछि उनको चर्चा चुलिएको थियो । आफु फागुन १७ मा स्वेदश फर्कने मिराले जानकारी दिइन् ।