सुर्खेत (हाम्रो खेलकुद) – यसै साता आयोजना हुने प्रथम कर्णाली हाफ म्याराथनलाई केएल दुगड ग्रुपको उत्पादन ज्ञान खाद्यान्नले मुख्य प्रायोजन गर्ने भएको छ । हाफ म्याराथन शनिबार आयोजना हुँदैछ ।

केएल दुगड ग्रुपको सहकार्यसँगै अब ज्ञान कर्णाली हाफ म्याराथन नामाकरण हुने बताइएको छ । केएल दुगड ग्रुपको उत्पादन धारा तेल लामो समयदेखि नेपालगन्ज म्याराथनमा मुख्य प्रायोजक रहँदै आएको छ । दुवै म्याराथनको व्यवस्थापन क्रियटिभ गन्ज मिडिया एण्ड इभेन्ट म्यानेजमेन्टले गर्दै आएको छ ।

सहकार्य गर्न पाउँदा केएल दुगड ग्रुपका सिईओ प्रदीप छाजेडले सुखी व्यक्त गरेका छन् । ‘स्वस्थ खाद्यान्न उत्पादनका लागि केएल दुगड ग्रुप जति गम्भीर छ, स्वस्थ रहन जागरण फैलाउने दौड सम्बन्धि इभेन्टलाई सहयोग गर्न पनि उत्तिकै तत्पर छ ’ सिईओ छाजेडले भने, ‘कर्णाली जस्तो भर्जिन ल्याण्डमा हुने म्याराथनलाई माथि उठाउन केएल दुगड ग्रुप सदैव तत्पर छ , कर्णाली म्याराथन चाँडै अन्तर्राष्ट्रिय स्तरमै ख्यातिप्राप्त म्याराथनका रुपमा स्थापित हुनेछ ।’

कर्णाली हाफ म्याराथनलाई क्रमिक रुपमा दौड संस्कृतिको विकाससँगै पर्यटन प्रवद्र्धन गराउने इभेन्टका रुपमा स्थापित गराउने आयोजकको तयारी छ । यस वर्ष आयोजना हुने दसौं राष्ट्रिय खेलकुदलाई प्रवद्र्धन गर्नेगरी कर्णाली हाफ म्याराथन आयोजना गर्न लागिएको बताइएको छ ।

पहिलो संस्करणको सफलतासँगै हरेक बर्ष उपयुक्त समयमा कर्णाली हाफ म्याराथन आयोजना गरिने जनाइएको छ।
कर्णाली हाफ म्याराथनको संयोजन वीरेन्द्रनगर नगरपालिकाका निवर्तमान मेयर देवकुमार सुवेदीले गरेका छ् । त्यसैगरी कुमारशमसेर थापालाई सदस्यसचिवको जिम्मेवारी दिएको छ ।

नेपालगन्ज म्याराथन आयोजना एवं व्यवस्थापन गर्दै आएको क्रियटिभ गन्ज मिडिया एण्ड इभेन्ट म्यानेजमेन्टले दौड संस्कृतिको प्रवद्र्धन गर्दै प्रतिभाशाली खेलाडी खोज अभियान अन्तर्गत कर्णाली हाफ म्याराथन गर्न लागेको जनाएको छ ।

कर्णाली प्रदेश खेलकुद विकास परिषदसँगको आर्थिक सहयोग साझेदारी तथा अन्य स्थानीय पालिका एवं नीजि क्षेत्रको सहयोगमा कर्णाली हाफ म्याराथन हुन लागेको रेस नेपालका अध्यक्ष टीएस ठकुरीले बताएका छन् ।