विजय नेपाली, पोखरा

नेपाल भुतपुर्व खेलाडी मञ्चले आयोजना फागुनमा आयोजना गर्ने सफल पोखरा अन्तर्राष्ट्रिय म्याराथनलाई रोटरी डिस्ट्रिक ३२९२ ले सह प्रायोजकन गरेको छ । पोखरा म्याराथनको १८ औं संस्करण फागुन ५ गते आयोजना हुँदैछ।

पोखरा अन्तर्राष्ट्रिय म्याराथनबाट ३ वर्षका रोटरीले हरेक वर्ष २ लाख रुपैयाँ प्रदान गर्ने गरि सह प्रायोजकको रुपमा गरेको हो ।

रोटरी डिस्ट्रिकका गभर्नर राजेन्द्र प्रसाद धोजु र मञ्चका अध्यक्ष हरि प्रसाद पराजुलीले सम्झौता पत्रमा हस्ताक्षर गरे ।

मञ्चका अध्यक्ष पराजुलीले सफल पोखरा म्याराथनसँग जोडिएकोमा रोटरीलाई धन्यवाद ज्ञापन गरे । सामाजिक संस्था रोटरीसँग जोडिदा म्याराथनलाई थप ब्राण्डिङ र प्रर्बधन पुग्ने विश्वास लिइएको बताए ।

मञ्चका निवर्तमान अध्यक्ष तेज गुरुङले मञ्च र म्याराथनको बारेमा जानकारी दिदैं रोटरीसँगको समन्वय महत्वपूर्ण रहेको बताए ।

रोटरी डिस्ट्रिक ३२९२ का गभर्नर धोजुले खेलकुदमा प्रतिष्ठित संस्था भुतपूर्व खेलाडी मञ्चसँग जोडिन पाउनु ठूलो उपलब्धि रहेको सुनाए । उनले रोटरीले सामाजिक कार्य गर्दै आइरहँदा अन्तर्राष्ट्रिय प्रतियोगितामा जोडिदा थप उचाई बढ्ने बताए ।
उनले रोटरीले विश्वभर पोलियोको विषयमा जनचेतना फैलाउने काम गरेको र पोखरा म्याराथनमार्फत समेत पोलियोकै जनचेतना फैलाउने गरी अघि बढ्ने बताए ।

धोजुले रोटरीले आगामी फागुनमा पोखरामो सम्मेलन गर्न लागेको र देशभरका रोटरियन पोखरा आउने भएकाले ठूलो समूह प्रतियोगितामा उपस्थिति गराउने प्रतिबद्धता व्यक्त गरे ।

मञ्चका द्धितीय उपाध्यक्ष खेम गुरुङले दुई संस्थाबीचको सम्झौताले एक आपसमा सहयोग आदान प्रदान हुने बताए ।