काठमाडौं (हाम्रो खेलकुद) – झिल्टुङ्ग क्रसकन्ट्री दौडको आठौँ संस्करण माघको पहिलो सातामा हुने भएको छ।

‘जे गरौँ गज्जबले गरौं’ भन्ने नाराका साथ यस पटक माघ ६ गते दौड हुने बुधबार आयोजित पत्रकार सम्मेलनमा दौड संयोजक मोहन नेपालले जानकारी दिए ।

एथलेटिक्स परिवार नेपाल संयोजनमा हुने झिल्टुङ्ग क्रसकन्ट्री दौड नुवाकोट जिल्लाको बेलकोटगढी नगरपालिका अन्तर्गत वडा नं ५ कोल्पुटारमा सुरु हुने बताइएको छ।

कोल्पुटरबाट बेलिनी, छाप, राजओडार, खड्गाछाप, सालचौर हुँदै फेरि कोल्पुटारमा पुगेर दौड सम्पन्न हुनेछ । दौडको दुरी १३.४ किलोमिटर कच्ची बाटो रहेको छ । जसमध्ये ४.५ किलोमिटर उकालो २ किलोमिटर समथर र बाँकी बाटो ओरालो रहेको छ ।

यसै गरी गत वर्ष जस्तै छात्र छात्रालाई मध्येनजर गर्दै ४.५ किलोमिटरको दौड “रन फर फन रेस” का लागि खुल्ला दौड प्रतियोगिता पनि आयोजना हुँदैछ । यस दौडको विशेष आकर्षण स्थानीय आमा तथा बा समूहको दौडहरु रहने आयोजकले जनाएको छ ।

१३.४ किमी हुने दौडमा खुल्ला पुरुष तर्फका‌ विजेताले समान १५, दोस्रोले १० र तेस्रोले ५ हजार रुपैयाँ प्राप्त गर्नेछन् । महिला तर्फको‌ विजेताले १०, दोस्रोले ७ र तेस्रोले ५ हजार रुपैयाँ पाउनेछन् ।

यस्तै ४.५ किमी खुल्ला जुनियर, स्थानीय ४.५ किमी १६ वर्ष मुनिका छात्रा/छात्र दौड, स्थानीय ४५ वर्ष माथिका पुरुष दौड, भेट्रान खुला १३.४ किमी पुरुष दौड र स्थानीय आमा समूह दौडका लागि पनि पुरस्कार राखिएको छ ।

एथलेटिक्स परिवार नेपालका अध्यक्ष राजन खत्री पनि दौडको संयोजक रहेका छन्। गत वर्ष पुरुषतर्फ सुमन कुलुङ्ग राई र महिला तर्फ रेखा विष्टले उपाधि जितका थिए ।