हिमाल खरेल,बिर्तामोड
देवी मावि मिनि म्याराथन (११ किलोमिटर) को उपाधि स्काइ लिम्बू र सुस्मिता राईले जितेका छन् ।

धुलाबारी मोडबाट आज मंगलबार भएको मिनि म्याराथनमा मिक्लाजुङ ३ पाँचथरका स्काइले निर्धारित दूरी ३९ मिनेट ०३ सेकेन्डमा पूरा गर्दै पुरुषतर्फ च्याम्पियन बनेका हुन् ।

त्यस्तै, भद्रपुर २ की सुस्मिताले ५५ मिनेट ५८ सेकेन्डमा निर्धारित दूरी पार गर्दै महिलातर्फ च्याम्पियन बनिन् ।विजेता दुबैले समान २१ हजार रुपैयाँ, मेडल र प्रमाणपत्र पाउने छन् ।

त्यस्तै, पुरुषतर्फ धावक फिदिम १० पाँचथरका मुक्साम लिम्बूले ३९ मिनेट १३ सेकेन्डको समय निकाल्दै दोस्रो स्थान हाँसिल गरे । शिवसताक्षी ३ का समिर कन्दङवाले ४० मिनेट दौड पूरा गर्दै तेस्रो स्थान हाँसिल गरे ।

दोस्रो भएका मुक्सामले १५ हजार रुपैयाँ, मेडल र प्रमाणपत्र पाउँदा तेस्रो भएका समिरले ११ हजार रुपैयाँ, मेडल र प्रमाणपत्र प्राप्त गर्ने छन् ।

महिलातर्फ बुद्धशान्ति ५ की सरिता दनुवारले निर्धारित दूरी ५८ मिनेट ३८ सेकेन्डमा पूरा गर्दै दोस्रो र अर्जुनधारा ११ की सिमना जवेगूले निर्धारित दूरी १ घण्टा १ मिनेट १३ सिकेन्डमा पूरा गर्दै तेस्रो स्थान हाँसिल गरिन् ।

सरिताले १५ हजार रुपैयाँ ,मेडल र प्रमाणपत्र पाउँदा तेस्रो भएकी सिमनाले ११ हजार रुपैयाँ, मेडल र प्रमाणपत्र प्राप्त गर्ने छन् ।

विजेताहरुलाई पुस १९ गते विद्यालयमा हुने वार्षिकोत्सवको कार्यक्रममा पुरस्कार प्रदान गरिनेछ । प्रतियोगितामा महिला तथा पुरुष गरी १ सय ३४ जना धावकहरुले सहभागिता जनाएका थिए ।

बिर्तामोडको देवी माविले आफ्नो ६१ औँ वार्षिकोत्सवको अवसरमा प्रतियोगिता आयोजना गरिएको प्रधानाध्यापक अम्बिका श्रेष्ठले जानकारी दिइन् ।