काठमाडौं (हाम्रो खेलकुद) – नेपाली सैनिक शारीरिक तालिम केन्द्र तथा खेलकुद केन्द्रको आयोजनामा प्रधान सेनापति खुल्ला म्याराथन दौड प्रतियोगिता यसै महिना अन्तिममा हुने भएको छ ।

महाशिवरात्री तथा २ सय ६० औं सेना दिवसको अवसरमा आठौं संस्करणको खुल्ला म्याराथन माघ २८ मा हुने भएको छ । म्याराथनमा खुल्ला पुरुष, हाफ म्याराथन महिला तथा पुरुष, १० किलोमिटर र ५ किलोमिटर हुनेछन् । १० किलोमिटरमा नेपाली सेनाका अधिकृत, सैनिक महाविद्यालय, एनसिसीका विद्यार्थी, सैनिक सहचारी, सैनिक सहचारी कार्यलयका पदाधिरी हुनेछन् ।

म्याराथनर्फको विजेताले तीन लाख, दोस्रोलाई दुई लाख, तेस्रो हुनेले एक लाख र चौथो हुने खेलाडीले ५० हजार पुरस्कार प्राप्त गर्नेछन् । पाँचौं हुनेले ३० हजार, छैटौंले २५ हजार, सातौंले २० हजार र आठौं हुनेले १५ हजार प्राप्त गर्नेछन् । नवौं हुनेले १० हजार र दशौं हुनेले ५ हजार प्राप्त गर्नेछन् । म्याराथन विजेतालाई मोटरसाइकल तथा स्कुटर प्रदान गरिनेछ ।

हाफ म्याराथन पुरुष र महिला विजेताले समान ७५ हजार, दोस्रो हुनेले ५० हजार र तेस्रो हुनेले ३० हजार प्राप्त गर्नेछन् । जम्मा पुरस्कार रकम १२ लाख रहेकोछ । सहभागी जनाउन माघ ९ देखि १८ गतेसम्म जंगी अड्डा भद्रकालीबाट विहान १० देखि ४ बजेसम्म निशुल्क दर्ता गर्न सकिनेछ ।