सटपुटपछि ज्याभलिङ थ्रोमा पनि चन्द्रकलाको राष्ट्रिय कीर्तिमान

दिपेन्द्र पोखरेल
इटहरी– नेपाल पुलिसकी चन्द्रकला लामगादेका महिला ज्याभलिङ थ्रोमा नयाँ राष्ट्रिय कीर्तिमान बनाएकी छिन् । इटहरी रंगशालामा आइतबार चन्द्रकलाले ४३.९४ मिटर थ्रो फाल्दै नयाँ कीर्तिमानका साथ स्वर्ण पदक जितेकी छिन् । यसअघि ४ मिटरको आफ्नै कीर्तिमानलाई सधार्दै चन्द्रकलाले नयाँ कीर्तिमान कायम गरिन् ।

सातौं राष्ट्रिय खेलकुदमा चन्द्रकलाको यो दोस्रो राष्ट्रिय कीर्तिमान हो । उनले अघिल्लो दिन शनिबार महिला सटपुटमा राष्ट्रिय कीर्तिमान बनाउँदै स्वर्ण पदक जितेकी थिइन् । चन्द्रकलाले ११.५६ मिटर दुरी थ्रो फाल्दै नयाँ कीर्तिमान बनाएकी थिइन् । राष्ट्रिय कीर्तिमान बनाउनेलाई राष्ट्रिय खेलकुद परिषद् (राखेप)ले २५ हजार रुपैयाँबाट पुरस्कृत गर्ने यसअघि नै सार्वजनिक गरिसकेको छ । चन्द्रकलाले दुई वटा कीर्तिमानको ५० हजार रुपैयाँ पाउनेछिन् । महिला ज्याभलिङमा लक्ष्मी थारुले ३९.९९ मिटरका साथ रजत पदक जितिन् । सिमा कुमारी थारुले ३९.२७ मिटर दुरी फाल्दै कास्य पदक हात पारिन् ।