पोखरा (हाम्रो खेलकुद) – विभागीय त्रिभुवन आर्मी क्लबकी जयरानी थारुले नवौं राष्ट्रिय खेलकुदमा दोस्रो स्वर्णपदक जितेकी छिन् ।

पोखरा रंगशालास्थित एथलेटिक्स ट्याकमा सोमबार भएको महिला १ सय मिटर हडल्समा स्वर्ण जित्दै उनले नवौंमा आफ्नो स्वर्ण संख्या २ पुर्‍याएकी हुन् ।

यसअघि उनले ४ सय मिटर हडल्समा नयाँ राष्ट्रिय कीर्तिमानसहित स्वर्ण पदक जितेकी थिइन् । जयरानीले आफ्नै कीर्तिमान भंग गर्दै १ मिनेट ०४ः१३ सेकेन्ड (ह्यान्ड टाइमिङ) को नयाँ राष्ट्रिय कीर्तिमान बनाएकी छिन् ।

झण्डै ४ महिनामा नै उनले आफ्नो कीर्तिमान भंग गरेकी हुन् । काठमाडौंमा असारमा उनले १ मिनेट ०७.२ सेकेन्डको राष्ट्रिय कीर्तिमान बनाएकी थिइन् ।

हिटमा राष्ट्रिय कीर्तिमान बनाएकी जयरानीले फाइनलमा भने निर्धारित दुरी १५ः६९ सेकेन्डमा पुरा गर्दै स्वर्ण जितिन् । उनले हिटमा १५ः१६ सेकेन्डको नयाँ राष्ट्रिय कीर्तिमान बनाएकी थिइन् ।

उनले यसअघि उनले गत असारमा १५ः२० सेकेन्डको कीर्तिमान बनाएकी थिइन् । आर्मीकी निर्मला थापाले १६ः२५ सेकेन्डसहित रजत जित्दा एपिएफकी भागरथी कुमारी थारुले १९ः१३ सेकेन्डसहित कास्य जितिन् ।

पुरुषतर्फ ११० मिटर हडल्समा आर्मीका जीवन चौधरीले १५ः०३ सेकेन्डसहित स्वर्ण जिते । १५ः८१ सेकेन्डको समय निकाल्दै पुलिसका चन्द्रदेव जोशीले रजत तथा आर्मीका रामप्रसाद थारुले १९ः०० सेकेन्डसहित कास्य जिते ।