काठमाडौं (हाम्रो खेलकुद) – विभागीय नेपाल एपिएफ क्लबका शिवराज पार्की र अर्काे विभागीय टोली त्रिभुवन आर्मी क्लबकी जयरानी थारु ४४औं राष्ट्रिय एथलेटिक्स प्रतियोगितामा सर्वाेत्कृष्ट खेलाडी बनेका छन् ।

आइबार सम्पन्न भएको प्रतियोगितामा शिवराजले ३ स्वर्ण र १ रजत जित्न सफल भएका थिए । उनले १ सय मिटर, २ सय मिटर र ४ वाई १ सय मिटर रिलेमा स्वर्ण तथा ४ वाई ४ सय मिटर रिलेमा रजतपदक जित्न सफल भएको थियो ।

जयरानीले २ कीर्तिमानीसहित ४ स्वर्ण कब्जा गरिन् । जयरानीको नाममा थप १ रजत पनि रह्यो । जयरानीले १ सय र ४ सय मिटर हर्डल्समा कीर्तिमान रचेकी थिइन् । प्रतियोगितामा कुल ३ राष्ट्रिय कीर्तिमान बने । थप १ कीर्तिमान आर्मीका जीवन थारुले पुरुष १ सय १० मिटर हर्डल्समा बनाएका थिए । जीवनले १ कीर्तिमानीसहित २ स्वर्ण र उत्तिनै रजत हात पारे । प्रत्येक राष्ट्रिय कीर्तिमानका लागि ५ हजार नगद पुरस्कार रहेको छ ।

तीन दिनसम्म चलेको प्रतियोगितामा आर्मी १८ स्वर्ण, १२ रजत र ५ कांस्य जित्दै टिम च्याम्पियनको उपाधि जित्न सफल भएको छ । नेपाल एथलेटिक्स संघको आयोजनामा त्रिपुरेश्वरस्थित दशरथ रंगशालामा भएको प्रतियोगितामा एपीएफ क्लब ९ स्वर्ण, ६ रजत ८ कांस्यसाथ दोश्रो भयो । तेश्रो स्थानको बाग्मती प्रदेशले ३ स्वर्ण, २ रजत र ६ कांस्य हात पा¥यो ।

३२ स्वर्णका लागि भएको प्रतिस्पर्धामा बाँकी २ स्वर्ण नेपाल प्रहरी क्लबले जित्यो । प्रहरीले ३ रजत र ४ कांस्य पनि हासिल ग¥यो । सात प्रदेश र तीन विभागीय गरी १० टिम सहभागी प्रतियोगितामा ६ टिम स्वर्णविहीन रहे ।

प्रतियोगिताको अन्तिम दिन महिला ३ हजार मिटर दौडमा बागमती प्रदेशकी सन्तोषी श्रेष्ठले १० मिनेट ६.६ सेकेन्डमा दुरी पार गर्दै स्वर्ण जितिन् । पुलिसकी राजपुरा पछाईले १० मिनेट ८.४ सेकेन्डसहित रजत तथा कर्णाली प्रदेशकी राममाया बुढाले १० मिनेट ४९.९ सेकेन्डमा दुरी पार गर्दै कास्य हात पारिन् ।

पुरुषमा एपिएफका गोपीचन्द्र पार्कीले ८ मिनेट २९.५ सेकेन्डसहित स्वर्ण जिते । आर्मीका मुकेश पालले ८ मिनेट ३० सेकेन्डमा दुरी पार गर्द रजत तथा आर्मीकै दीपक अधिकारीले ८ मिनेट ३८ सेकेन्डमा दुरी पार गर्दै कास्य जिते ।

४ वाई ४ सय मिटर रिले पुरुषमा आर्मीका सोम बहादुर कुमाल, जीवन थारु, प्रकाह दनुवार र राम प्रसाद थारुको टोली पहिलो भयो । एपिएफका शिवराज पार्की, आशिष चौधरी, निर प्रताप महतो र सन्जिव नेपालीको टोली दोस्रो तथा पुलिसका सहन चन्द्र शाह, अमृत बोट, ओम प्रकाश शाह र तेज बहादुर कार्कीको टोली तेस्रो भयो ।

महिलामा एपिएफकी रमिता कुमारी थारु, भागरति कुमारी थारु, कल्पना श्रेष्ठ र फुलमती रानाको टोलीले स्वर्ण जित्न सफल भयो । आर्मीकी निर्मला थापा, जयरानी थारु, सरस्वती भट्टराई र राधिका श्रेष्ठको टोलीले रजत तथा बागमती प्रदेशकी रजिना दुलाल, अन्जु खड्का, अनिता मिजार र प्रकृति सुवालको टोलीले कास्यपदक हात पारिन् ।

त्रिपल जम्प महिलामा एपिएफकी शिला चौधरी पहिलो, पुलिसकी सिमा चौधरी दोस्रो तथा आर्मीकी निर्मला थापा तेस्रो भइन् । पुरुषमा बागमती प्रदेशका भुवन महतो पहिलो, आर्मीका शेर बहादुर विष्ट दोस्रो तथा एपिएफका सलिम देवान तेस्रो भए ।

डिस्कस थ्रो महिलामा आर्मीकी सिता शाही पहिलो, लुम्विनी प्रदेशकी संगिता अधिकारी दोस्रो तथा आर्मीकी मिना बुढामगर तेस्रो भइन् । पुरुषमा आर्मीका चित्र बहादुर वली पहिलो, पुलिसका पुस्कल खड्का दोस्रो तथा एपिएफका मिलन चौधरी तेस्रो भए ।

विजेतालाई युवा तथा खेलकुद मन्त्रालयका सचिव डा. दामोदर रेग्मी, राष्ट्रिय खेलकुद परिषद्का सदस्य–सचिव टंकलाल घिसिङ, नेपाल एथलेटिक्स संघका अध्यक्ष राजीवविक्रम शाहलगायतले एक कार्यक्रमबीच पुरस्कृत गरे । तीनदिने प्रतियोगितामा २ सय ४० खेलाडीको सहभागिता रहेको आयोजक संघका सचिव आरके विष्टले जनाएका छन् ।