काठमाडौं (हाम्रो खेलकुद)– झन्डै दुई साताअघि हङकङको अक्सफाम ट्रयालवाकर २०१६ को १ सय किलोमिटर अल्ट्रा दौडको उपाधि जित्ने नेपाली टोलीलाई वि विल राइज फाउन्डेसनले बुधबार सम्मान गरेको छ । मंसिर ४ गते भएको प्रतिस्पर्धामा बेदबहादुर सुनुवार, पूर्ण तामाङ, तीर्थबहादुर तामाङ र भिमबहादुर गुरुङ सम्मिलित टोलीले सय किलोमिटर दौड ११ घन्टा १ मिनेटमा पुरा गर्दै उपाधि जितेको थियो । टोलीका चारै खेलाडी नेपाली सेनाका हुन् ।

पछिल्लो तीन बर्षमा यसपटक सबैभन्दा छिटो दौड पुरा भएको थियो । पहिलो हुने टोलीले गत बर्ष ११ घन्टा ५८ मिनेट र सन् २०१४ मा ११ घन्टा ५६ मिनेटमा दौड पुरा गरेका थियो । यसपटक विभिन्न विधामा गरि १० हजार भन्दा बढीले दौडमा भाग लिएका थिए । साइ कुङबाट सुरु भएको दौड युन लोङ पुगेर टुंगिएको थियो । आयोजकले ४८ घन्टा भित्र दौड पुरा गर्नका लागि कटआउट टाइम तोकेको थियो ।
तेन्जिङ हिलारी एभरेस्ट म्याराथनको प्रदर्शनका आधारमा एलिट मान्यताका साथ नेपाली टोलीलाई आयोजकले नै सबै खर्च बेहोर्ने गरी निमन्त्रणा प्राप्त गरेको थियो । यसपटकको एभरेष्ट म्याराथनका बेदबहादुर विजेता र पूर्णबहादुर उपविजेता हुन् । तीर्थबहादुर यो बर्षका एभरेष्ट अल्ट्रा रेसका विजेता हुन् । भीमबहादुरले दुई बर्षअघि अन्य खेलाडीसँग मिलेर अक्सफामको उपाधि जितेका थिए ।