प्रकाश तिमल्सिना, काठमाडौं

सम्बन्धित विभागले सिफारिस नगरेको भए १३ औं दक्षिण एसियाली खेलकुद (साग) का औलामा गन्न सकिने स्वर्ण पदक विजेता खेलाडी पनि मानपदवीबाट बञ्चित हुने देखिएको छ ।

विभागीय टोली (नेपाली सेना, नेपाल प्रहरी र शसस्त्र प्रहरी) को सिफारिसमा गत वर्ष स्वदेशमा आयोजना भएको १३ औं सागका १५ खेलाडी विभिन्न मानपदवीबाट विभूषित भएका छन् ।
संविधान दिवसका दिन राष्ट्रपतिबाट विभिन्न क्षेत्रका व्यक्तित्वहरुलाई मानपदवी, अलंकार र पदकद्वारा विभूतिष गर्ने घोषणा गर्ने परम्परा अनुसार यो वर्षको शनिबार घोषणा भएको थियो ।

ओलम्पियन संगिना वैद्य, राष्ट्रिय खेलकुद परिषद् (राखेप) सदस्य सचिव रमेशकुमार सिलवाल, राखेप कार्यकारी समितिका सचिव कुलबहादुर थापाले मानपदवी प्राप्त गर्दा सागका पदक विजेता खेलाडीलाई भने वेवस्ता गरिएको छ ।

विभागबाट सिफारिस भए पदक प्राप्त गर्नेमा प्रहरीका ७, सेनाका ६ र शसस्त्रका २ खेलाडी छन् ।
सेनाका हिमालय तमाटाले परम पौरख भाष्कर अलङकार प्राप्त गर्नेछन् । नेपाल प्रहरीका ७ खेलाडी नेपाल प्रताप भूषण अलङ्कार पाउने भएका छन् । त्यस्तै सेनाका ५ र शसस्त्रका २ खेलाडीका नामा स्वीकृति पदक घोषणा भएको छ ।

३६ वर्ष लामो इतिहास बोकेको सागको १३ औं संस्करणमा नेपाललाई एतिहासिक सफलता दिलाउने १५ बाहेकका बाँकी खेलाडी भने मानपदवीबाट बञ्चित भएका छन् । सागमा ५१ स्वर्ण, ६० रजत र ९६ कास्य गरि कुल २ सय ७ पदक जित्दै नेपाल पदक तालिकामा दोस्रो भएको थियो ।
सागमा पदक तालिकामा दोस्रो पटक दोस्रो स्थानमा रहन सफल भएपनि पदकका हिसाबले यो सागमा नेपालको अहिले सम्मको सबै भन्दा ठूलो सफलता हो ।

सागमा पौडीकी गौरिका सिंहले ४, तेक्वान्दोकी आयशा शाक्य, करातेका मण्डेकाजी श्रेष्ठ र गल्फका सुवास तामाङले समान २ वटा स्वर्ण पदक जितेका थिए । पौडीमा व्यक्तिगत इभेन्ट्समा स्वर्ण पदक जित्ने ओलम्पियन गौरिका नेपाली खेलकुद इतिहासमै पहिलो हुन् ।

फुटबल टोलीले स्वर्ण जितेको थियो भने बाँकी खेलाडीले समान १ स्वर्ण पदक विजेता थिए । तर राष्ट्रपतिबाट प्रदान गरिने मानपदवीमा भने खेलाडीमाथि वेवास्ता भएको छ । राखेपले सिफारिस गरेका कुनै पनि खेलाडीले मानपदवी पाएनन् ।

राखेपले स्वर्ण पदक जित्ने सबै खेलाडी र सम्बन्धित खेलको प्रशिक्षकका लागि मानपदवी सिफारिस गरेको राखेप कार्यकारी समितिका सचिव समेत रहेका प्रवक्ता कुलबहादुर थापाले जानकारी दिए ।
नेपाल राष्ट्रिय तथा अन्तर्राष्ट्रिय खेलाडी संघका अध्यक्ष दीपक श्रेष्ठका अनुसार युवा तथा खेलकुद मन्त्रालयमार्फत राखेपले स्वर्ण पदक विजेतालाई मानपदवीका लागि फारम भराएको थियो । आफै मुल्याङ्कन गरेर दिइनुपर्ने मानपदवीका लागि फारम भराएको स्मरण गर्दै श्रेष्ठले त्यसका वावजुद अहिले सुचिमा नराखिनुलाई भने अपमान भनेका छन् ।

त्यस्तै नेपाली सेनाका पूर्व खेलकुद विभाग प्रमुख महासेनानी शशि किरण रायमाझीले अति पौरख भाष्कर अलङकारबाट विभूषित हुने भएका छन् ।

अलङ्कार र पदक पाउने स्वर्ण पदक विजेता विभागिय खेलाडी :

हिमाल टमाटा (डुवाथोलन)– आर्मी – परम पौरख भाष्कर

विकास थापा (भारोत्तोलन)– पुलिस – नेपाल प्रताप भूषण

कमल श्रेष्ठ (तेक्वान्दो) – पुलिस – नेपाल प्रताप भूषण

वीरबहादुर महरा (तेक्वान्दो) – पुलिस – नेपाल प्रताप भूषण

भूपेन्द्र थापा (बक्सिङ) – पुलिस – नेपाल प्रताप भूषण

सुनिता महर्जन (कराते) – पुलिस – नेपाल प्रताप भूषण

सरु कार्की (कराते)– पुलिस – नेपाल प्रताप भूषण

देविका खड्का (जुडो) – एपिएफ – स्वीकृति पदक

किरणसिंह बोगटी (म्याराथन) – एपिएफ – स्वीकृति पदक

सञ्जिव ओझा (तेक्वान्दो) – आर्मी– स्वीकृति पदक

संगिता मगर (तेक्वान्दो) – आर्मी – स्वीकृति पदक

निता गुरुङ (तेक्वान्दो) – आर्मी – स्वीकृति पदक

मिनु गुरुङ (बक्सिङ) – आर्मी– स्वीकृति पदक

प्रविण मानन्धर (कराते) – आर्मी – स्वीकृति पदक