काठमाडौं (हाम्रो खेलकुद) – इन्डोनेसियामा आयोजना हुने १८ औं एसियाली खेलकुदमा सहभागी हुन नेपाली प्याराग्लाइडिङ टोली मंगलबार इन्डोनसिया प्रस्थान गरेको छ । नेपाली टिम थप प्रशिक्षणको लागि एसियाड शुरु हुनुअघि नै इन्डोनेसिया प्रस्थान गरेको हो ।

टिमलाई नेपाल प्याराग्लाइडिङ तथा ह्याङग्लाइडिङ संघका केन्द्रिय महासचिब शैलेन्द्र राउत, नेपाल खेलकुद पत्रकार मंच कास्कीका अध्यक्ष केशब पाठक लगायतले विदाई गरेका थिए ।

प्याराग्लाईडिङ खेलमा पुरुषतर्फ ५ जना र ३ जना महिला खेलाडीहरु गरि कुल ८ जना खेलाडी रहेका छन् । टिममा कान्छा उमेरका १६ वर्षिय खेलाडी युकेश गुरुङ पनि छन् । नेपाली प्याराग्लाइडिङ टिमले इन्डिभिजुअल एक्युरेसी, टिम क्रस कन्ट्री र टिम एक्युरेसीमा महिला पुरुष खेलाडीले छुट्टा–छुट्टै पदकका लागि भिड्ने छन ।

खेलाडीहरुमा बिमल अधिकारी (टिम कप्तान) बिशाल थापा, सुशिल गुरुङ, युकेश गुरुङ, बिजय गौतम र महिला खेलाडीहरुमा त्रिशा श्रेष्ठ, प्रतिमा भुजेल र सविता तामाङ रहेका छन् । टिमसँगै प्रशिक्षक योगेश भट्टराई पनि संगै प्रस्थान गर्दैछन् । नेपाली टिमका व्यवस्थापक शैलेन्द्र राउत र अर्का प्रशिक्षक सानुबाबु सुनुवार भने एक साता पछि त्यस तर्फ प्रस्थान गर्ने बताइएको छ । प्याराग्लाइडिङ खेल अगस्त १८ देखि ३० गते सम्म आयोजना हुँदैछ ।

प्याराग्लाइडिङमा खेल आयोजना हुने स्थानको हावाको चाप लगायतले पनि प्रभाव पार्ने हुनाले खेलाडीलाई त्यहाँ अभ्यस्त बनाउन एक साताअघि नै इन्डोनेसिया जना लागेको प्रशिक्षक योगेश भट्टराईले जानकारी गराए ।